Ulamma anulfu-ines yettuɣal ɣer useggas n 2014 ɣef wamek i d-qqaren yiɛeggalen-is, maca ttesriḥ-is unsib armi t-id-tewwi ussan-a iɛeddan, deg 15 furar 2018, mbeɛd aṭas n tazzla d uḥebber. Imi dɣa ugur n waya, yella yeqqen kan ɣer uxxam (siège) anda ara sersen abiru n tdukkla-nsen. Ɣef leḥsab n yiɛeggalen n tdukkla Tadukkli n Ayt Mbarek, llan xedmen akk ayen ilaqen seg yimir-nni, am lekwaɣeḍ n tedbelt d usuter n tallelt ɣer tɣiwant, akken ad afen axxam i tddukkla-nsen, maca ur ufin ara. Armi d taggara-a i yefra wugur-nni, yelḥeq-asen-d ttesriḥ unsib. Seg wass-n yettwakkes-asen dayen lqid, bdan xeddmen ttiɛadat. Dɣa gan deg yimuras yezrin kra n warmuden i ubaɣur n warrac n uɣerbaz, ideg i d-heggan, abeɛda, timsizlin gar ukuẓ n yiɣerbazen, rnan xedmen-d asenɛet n kra n tceqqufin i teḍsa d unnecraḥ sɣur terbaɛt Imseḍsiyen. Ma yella d ussan-a iɛeddan, i lmend n usfuggel n tefsut taberkant, thegga-d tddukkla Tadukkli ahil d amerkanti, s wazal-is, ideg bdant temsiknin seg tsebḥit armi d meqrub tameddit. Heggan-d daɣen amunulug i d-yewwi Mass Mebruk Lee, akked kra n tedwilin n tmedyazt sɣur kra n yilemẓiyen n temnaḍt, d kra n wakud n tiwin n yisefra i wid yerzan merra. Ugar n waya, yella-d usarag sɣur Mass Yasin Hebbac ɣef uwellih n tidet n umennuɣ amagday. Yemmug daɣen yiwen n ugala n ccna sɣur Massen Hebbac Zahir, Wali Ɛbelɣani d wiyaḍ. Deg teɣzi n tegnit-a n ccna, ttwawint-d s waṭas tezlatin-nni timḥaddiyin, akked tid i d-yesmektayen imeɣnasen yeɣlin deg tefsutin tirẓaganin i wakken ass-a ad tesɛu tmaziɣt amkan-is. Ad d-nesmekti d akken amussu asdukklan deg temnaḍt n Ayt Mbarek, taɣiwant n Tsexriwt, ur yejhid ara iseggasen iɛeddan imi uqant maḍi tddukkliwin ara d-ibanen deg unnar.
Kaissa Khalifi