Aḥric wis 8
Nettat tuḥṛict tejgugel γef yiwen ufurk si tama, tenṭeg am tebkit γer wayeḍ di tama-nniḍen, tneggez γer tγerγert, terwel, teεna daγen aseklu-nni n tjujtin, terra-as i ufṛux acebḥan icettiḍen icebḥanen, telsa ijerbuben, tuγal s amḍiq-is n tguni, anida i tt-in-ufan teẓẓel. Ass wis kraḍ n tmeγra, akken uγen abrid-nsen daγen iεeggalen n twacult s axxam n ugellid, teεna ula d nettat aseklu n tjujtin i d-yemγin γef uẓekka n yemma-s, tenna-as:
“ Huzz iman-ik, mmhihed ttxil-k ay aseklu, akken igenni ideg tella yemma, s wuraγ d lfeṭṭa ad d-yeglu!”
Iḍegger-as-d taqendurrt yifen akk tiqnedyarr ssnen yimdanen, werğin tella yiwet am nettat yerna-as-d tarkasin n wuraγ. Akken tewweḍ s axxam n tmeγra, ibedd-asen umeslay i lγaci-nni yellan din, u yeεrreq-as d acu ara yini, wayeḍ γas ur yekcim ara εemrrayen, maca ur yezmir ara ad yessali awal, amzun yeṭṭef-it buberrak, yal wa, yal ta d acu n uεewwiq i d-yemlal. Mmi-s ugellid ḥala yid-s kan i yecḍeḥ, daγen ula d ass-nni, yeṭṭef deg wawal-is, yeqqar-asent akk i sut tεenqiqin-nni yulin deg igenni: ‘’Ɣas sersemt iman-nkent, nekk d tagi kan, d tagi, ḥala yid-s ara ceḍḥeγ’’. Akken i d-yewweḍ lawan ideg ad teqqel s iγiγden yuran di twenza-s, ira urgaz ad tt-yessiweḍ s axxam, ad tt-iwanes deg ubrid, maca nettat tessenser daγen idaṛrren-is s uγiwel mi akken yezzi udem-is s anda-nniḍen. Ula d netta daγen d uccen, yendi-as ticerrket war ma tfaq. Yendeh i sin yimγiden-nsen, yenna-asen: ‘’Mi tt-twalam kan tusa-d, nneγlet tiquftin n llazuq γef tseddarrin, ur tettut ara ula d iran’’. Ɣas akken tessufeγ-d iman-is si tseddarrin-nni ideg i d as-teḍra am tin i d-izegren asif aεebbas mi ara d-yeḥmel, maca tessegran deffir-s tarkast-is tazelmatḍt, yeckunteḍ deg-s llazuq, yeqleε-as-tt-id. Mmi-s n ugellid, yufa-d tarkast-nni tessegra deffir-s, yerfed-itt, yufa-tt d tameẓyant, d taleqqaqt yerna d urraγ akken ma tella. Tettkemmil
Yerra-tt-id seg talmanit Essaid Ait Maamar