Almi ɛeddan ukuẓ n yiseggasen i d-teḥḍer tuffɣa tunsibt n yiseɣrez (album) amaynut n Farid Ferragi, bab n tezlit n tayri ed yiḥulfan. Dɣa, seg winna n 2012 mu yefka azwel « Nekk ed yiman-iw », yuɣal-d unaẓur tikkelt-a s win i d-yefren s uzwel n « Itri arugal » (Étoile filante). D ameslay s tḥawact kan, war ma nɣez, ɣef wayen yellan deg-s, s sḍis-is (setta) n yizwal, ad d-nini yeɛreḍ unaẓur ad d-yesdukkel kra n yisental s wudem d amaynut. Am, war tisewham, tezlit n tayri, i ilaqen ad yili s tnaga-s (témoignage) ula d netta asmi t-nesteqsa send ad d-yeffeɣ. Dɣa, yuɣal-d s tayri s snat n tezlatin timezwura, mu yefka azwel « Am yitri iɛeddan » akked « I ṭṭlam weḥd-i ». Deffir tezlit tis kraḍ « Nettraju » ideg d-yesres unaẓur kra n tmuɣliwin s usirem akken i t-nennum, tusa-d tezlit tis ukuẓ umi yettunefk uzwel « Ccib », akken tban, yewwi-d deg-s Farid Ferragi s tmussni-s ameslay ɣef wamek i d-trezzu temɣer s yizeɣbuben imellalen ɣef uqerru. Dima s taɣect i ur nbeddel ɣef tin mi t-ttuɣ meẓẓi, bab n tezlit « Ay iḍ » yecna akk tizlatin n yiseɣrez-a s waṭas n yiḥulfan, ladɣa snat n tezlatin tineggura i ibudd unaẓur bu 63 n yiseggasen i yemma-s i yewwḍen ɣur Rebbi ilindi. Tijmilin-a, s yizwal n « Sikkideɣ deg-m a yemma » akked « Mazal-ikem » ad yefhem seg-sent yiwen tayri n umimmit i yemma-s, ideg ameslay gar-asen yella, ad yili i lebda. Wa d agzul d amecṭuḥ ɣef yiseɣrez n Farid Ferragi n useggas-a n 2016, ahat ad d-nawi awal fell-as s telqey tikkelt nniḍen. Ad d-nini kan belli yesḥissif waddad imi aḍebsi-ya almi i t-id-nuɣ seg waɣir n Bgayet, am winna n Zedek Mulud, acku ulac-it deg Ayt Smaɛel, deg Tsexriwt, wala Iderginen.
Mhenni Xalifi