Aṭas n yimawlan i yettlummun arraw-nsen, ma yella ur d-wwin ara igemmaḍ igerrzen deg uɣerbaz. Neɣ ma yella ur ḥṛicen ara warraw-nsen di ḥedd n tnegwa. Llan ula d imawlan yekkaten arraw-nsen, ttekksen-sen ayen akk ḥemmlen, qqaren-asen imeslayen i ten-ijerḥen, yecban ‘’Ay aɛeggun, ay abuhali, yif-ik umeddakkel-ik. Ma tkemmleḍ-tt akka, ad as-talseḍ i useggas. Ma ur d-tewwiḍ ara aseggas, ad ak-d-aɣeɣ taqeḍɛit n wulli ad tekseḍ…atg. Aya akk, yeqqazen deg wulawen-nsen. Syin akin, ttafen-d yigerdan-agi iman-nsen weḥd-nsen, war amnir. Uɣalen lemden warraw-nsen war iswi, war ma ẓran d acu qqaren, wala ayen ara ɣren ! Dɣa, ttkemmilen kan akken ur d-ttawin ara igemmaḍ igezzren, alamma dayen ṭṭaxṛen-d deg uɣerbaz. Llan wiyaḍ, xfif wallaɣ-nsen, ur d-ttafen ara ttawil anagar tamrart ; neqqen iman-nsen, acku ur walan ara tifrat n ubrid ara ten-yessufɣen. Ɣef waya, ilaq ad d-akin yimawlan deg yiḍes-nsen, ad bedden s idis n igerdan-nsen. Deg tazwara, ilaq ad ḥsun yimawlan belli arraw-nsen, ur qqaren ara deg uɣerbaz s tutlayt n tyemmat-nsen. Aya, ɣef leḥsab n yimussnawen, d ugur meqqran ɣef kra n yigerdan. Tutlayt n tyemmat, d tamenzut ara yissin ugrud ɣer yimawlan-is uqbel ad yekcem s aɣerbaz, neɣ war ma yesselmed-as-tt uselmad. Asmi ara yekcem s aɣerbaz, zyada ɣef tutlayt-is, ad yernu, ad yelmed tutlayt-nniḍen. Ihi ugur n uselmed n tutlayin tiberraniyin d timezwura i ugrud deg uɣerbaz, ittaǧǧen kra n yigerdan ur ttiḥṛicen ara deg leqraya u tettiwɛir-asen ttrebga. Tis snat, ilaq imawlan, ad ḥṣun belli, llan kra, n yiselmaden imaynuten, xuṣṣen deg uswir n ulmud akked termit n uselmed. Qlilit wanda i semrasen tasnafsit akked tesensegmit sdat yinelmaden. Гef waya, yewwi-d i yimawlan, ad allen arraw-nsen deg uxxam. Ad ten-allen di temsirin-nsen, deg yiluɣma-nsen i wayen iwumi zemren. Xas ma mmi-tsen, ixuṣṣ, ilaq ad sɛun laɛqel, ad bedden, ad ilin s idis-is akken agrud ur iɣeffel ara. Yerna, ula d netta, ad yesɛu ugar n wafud, ad iḥemmel taɣuri. Ilaq imawlan, ad ttarran lmendad-nsen ɣer yidlisen akked tezmamin n warraw-nsen. Ma yella, ttḥadar-ten, ma yella ttarun timsirin i asen-d-yettak uselmad. Xas ma imawlan ur ssinen ara ad ɣren, ilaq, ad steqsayen arraw-nsen, ma yella yefka-asen-d uselmad iluɣma neɣ inadiyen-nniḍen ? Steqsayet arraw-nwen d acu ɣran ? D acu xedmen deg uɣerbaz ? D acu ara xedmen azekka-nni ? Rret lmendad-nwen ɣer yiselsa ttlusun, ɣer tikli-nsen, anwi d wid teddun ? Beddett ɣer ɣur-sen, akken ad bedden ɣer yiman-nsen. S wakka ad yefhem ugrud belli yella win i t-yettɛassan, ama deg uɣerbaz, ama deg uxxam. Ad iḥulfu s tɣellist. Ad yesɛu aɣbel akken ad yelmed, ad yuɣal d netta ara ak-d-yeqqaren : ‘’Yya ad i yi-teslmedeḍ aya d uya’’.Taneggarut, ilaq imawlan, ad ḍefren arraw-nsen s teɣzi n useggas, mačči deg wussan n yikayaden kan ara d-ttmektayen arraw-nsen. Yewwi-d fell-asen, ad steqsayen sya ɣer da ɣer uɣerbaz anda i qqaren. Akken, arraw-nsen, ad ḥulfun belli sɛan azal, sɛan amekkan-nsen gar-asen, yerna yella win yellan s idis-nsen. Ihi, aẓ ɣer mmi-k, ur ttwexxir ara d awexxer fell-as. S wawal ara d jebdeḍ mmi-k ɣer tama-k akken ad iɣer. Mačči s uɛekkaz, mačči s uqejjem, mačči s ubehdel, neɣ, ma ulac ha-t-an ad t-tesserwaleḍ fell-ak. Ḥṣu-t belli, imawlan iweɛren, ur ttissinen ara arraw-nsen. Ma d imawlan iseṛhen, yettaken tameẓẓuɣt i warraw-nsen, yeshel fell-asen ad ten-fehmen s sshala, ad ten-welhen ɣer wayen ilaqen. Ama deg uɣerbaz, ama di tudert-is n yal ass.
Fahim Messaoudène