Ihegga-d ugraw n tsekla Tira Tura n At Yanni yiwet n tuffɣa ass n 30 deg meɣres 2018 ɣer yiwen n umḍiq i d-yezgan deg Wat Wasif deg yiwet n taddart anida leḥwari-ines mazal-itent d tiqburen n tmurt n leqbayel, tagi qqaren-as Timeɣras; i d-yettbinin am uxelxal ddaw tleṭaṭ (main du juif) n udrar n Ǧerǧer. Amdiq-a, d yiwen n yifri isem-is Ifri Ṣemmḍen. Ihi, ṭṭfen abrid-nsen ɣer Wat Wasif s lferḥ d ameqqran, ḥaren ad awḍen. Mi leḥqen ɣer taddart-nni, iqubel-iten-id udrar aɛlayan d ubeḥri aṣemmad. Bdan la ttalin tiseddarin armi i wwḍen ar taggara n ubrid. Yiwet n tugna, tecbeḥ dayen kan; isekla ǧuǧǧgen. Mi kemmlen tikli ɣer sdat, slan i ucercur n waman ; ziɣ d tala i yellan deg tama-nni. Syin, walan ifri-nni, d ayen yessewhamen. Kecmen ɣer-s deg ṭza (9) yid-sen u s tidet ufan-n lḥal ṣemmeḍ, leḥḥun ɣef yiblaḍen, timeqqwa n waman, ad d-neggint fell-asen. Walan, diɣ, ijabab yulin d wid isubben (stalagmites et stalactites), akken kan i d-bdan talalit. Ifri-a, yesɛa azal n (80 ar 100 m) deg teɣzi u yezga-d ɣef ( 940 m) deg tiddi deg usamer-agafa n tmurt. Deg taggara, ahat yal yiwen deg-wen, ad yeɛreḍ ad iruḥ ɣer yifri-a imi yesɛa azal, u itkkes lxiq i umdan. Ɣef waya, ilaq ad neeseḥbiber ɣef yimeḍqan yecban-wigi.
Boughareb Dihia