Tiɣri n umsmekti, d album aneggaru n tcennayt Ferruǧa. Ad naf deg-s 10 n tezlatin s yisental yemgaraden : Tagmat, Meqqer ccan-im, Tafriqt, Ay aḥbib a leɛqel, Lexdeɛ, Iwalen s yinzan, Itran n lebda, D Imaziɣen, Abrid n tmacahut akked Aseggas atrar. D tizlatin iwumi texdem netta aẓawan, ma isefra, tewwi-d sya u sya. Tegmer-d ɣer Ahcène Marriche, Salah Amrane, Kader Bouchlaghem, Si Lhocine Ait Ourab Sfaw Twawa. Ula seg tama n usekles, aṭas i as-d-yefkan afus n tallelt. Tacennayt Ferruǧa i yettuneḥsaben d tacennayt n tezlit tamḥaddit, tesseḥbibir diɣ ɣef tgemmi d wayen akk i icudden ɣer yidles amaziɣ s umata. Mačči kan s teqbaylit i tcennu, meɛna tettawi-d isefra deg tmeslayin-nniḍen n tmaziɣt, ama tid yellan deg tmurt n Lezzayer, am temẓabit, tatergit, tacenwit d tiyaḍ, ama deg tmura n tefriqt ugafa, yecba Lmerruk, Tunes, Libya…atg. ‘’Bɣiɣ ad ttekkiɣ ula d nekk deg lebni n tutlayt s umata. Xas ulamma yal yiwen amek yettmeslay, meɛna nebɣa ad ttemsefhamen Yimaziɣen gar-asen. D wagi i d iswi-inu imi cennuɣ s tmeslayin-nniḍen n tmaziɣt’’, i aɣ-d-tenna tnaẓurt Ferruǧa. Ad nesmekti kan d akken aṭas n tejmilin i terra i yimeɣnasen n tmaziɣt akked wid yefkan idammen-nsen ɣef tmagit, yecban Mulud Mɛemmeri, Matub Lwennas, Muḥya neɣ Masinisa Germaḥ i yeɣlin d amezwaru deg Tefsut taberkant. Tɛawed tecna diɣ i kra n tezlatin, am Anujil n ucennay amẓabi Adel. Am wakken terra tajmilt i tlawin s tezlit ‘’Lli allaɣ-ik’’ deg useggas n 2004, acu kan ar tura mazal ur d-teffiɣ ara taɣect-a. Tecna diɣ ‘’Tanekra’’ deg useggas n 2003. Aṭas n tmeɣriwin n ccna i tga i tddukkliwin tidelsanin n tmurt n leqbayel mebla ma teḍleb deg-sent acemma. Afud igerrzen akked umecwar ɣezzifen i tcennayt.
Hocine Moula