Ayen swayes i d-glan yigeffuren iɛeddan deg waṭas n tamiwin n Bgayet, yeǧǧa imezdaɣ ad walin s wallen-nsen igemmaḍ n diri n wayen xeddmen teɣzi n useggas. Banent-d akka hah yir tigawin i yeḍla uɣerman i yiman-is. Aya, mi nwala akk amek uɣalent tuget n temnaḍin ččurent d iguda rrif yiberdan neɣ yiɣeẓran; kra n yiɣulad dermen, iberdan ttwaɣen. Tasebbiwt n waya d afeggeḍ i d-feggḍen yiɣeẓran d tregwa s uḥamul i d-yemlalen taffiwin n uhicur deg ubrid-nsen. Teɣzi n tsemhay-nniḍen, ur yesseḥsab umdan ad yeg tigawt isuben i ubaɣur-is netta d win n twennaḍt; anda yufa ad iḍegger aculliḍ, aɣeddu n wuzzal neɣ d taqerɛet n tebyirt deg umekkan i yemmugen kan i tikli n waman. Dɣa, mi ttnejmiɛent tɣawsiwin-a deg yiɣeẓran, iḍerfan d tregwa, regglen abrid i waman n lgerra deg tegrest-a yezrin. Ihi, faḍen-d waman ɣer yiberdan, ḍeggren-d iḥuccan-nni, am wakken hudden tiɣladin deg kra n temnaḍin. « Annect-a yakk d ayen nexdem, yenneqlab-d fell-aneɣ. Lemmer yal mi ara nebɣu ad nḍegger taɣawsa, ad tt-nawi ɣer wadeg iwulmen i wannect-nni, tili ur qfilen ass-a yiɣeẓran d tregwa-nneɣ ». I d-tenna yiwet n tmeṭṭut seg Ayt Smaɛel. Ad d-nesmekti d akken taɣiwant n Ayt Smaɛel gar temnaḍin i yettwaḥuzan s yiḥamulen i d-ifaḍen, setwaɣen kra ufan deg ubrid-nsen. Aṭas n yiberdan i ibeddlen ssifa, rnu yella wanida xesrent kra n tregwa, ilaq-asent aɛiwed n lebni, neɣ xersum d areqqeɛ. Ɣur yimezdaɣ, llan wid yeccektan i tɣiwant mi walan tɛeṭṭel ur d-tger iman-is deg kra n yimukan ansi i d-neflen yiḥamulen. Maca aṭas n wid ur nerri ṭṭlem ɣef yimḍebbren n tɣiwant-a iɣef i d-nettmeslay, meskud ugur i d-ilulen yekka-d seg yiḍumman i ttḍeggiren deg wayaqeddac deg yiɣeẓran d tregwa iɛeddan seg rrif n yixxamen. Asteqsi ihi i ilaq ad d-yefk yiwen, ɛni lemmer yelḥa s sswab uɣerman n Ayt Smaɛel, iḍegger akken d wanda ilaq iḍumman n uxxam-is, ma ad d-yemlil ɣer taggara inalkamen (conséquences) am wid i t-ihewwlen ussan-a iɛeddan. Ayen yernan i wugur temɣer, d mi uqant ayendin deg temnaḍt-a tamsedrart tddukkliwin n twennaḍt ara d-yelhun d usizdeg d ubraz akka tura mi d-tekcem tefsut. Ma d tigawt-nni n uḍegger n tɣawsiwin anda i d-yewwi Rebbi, ahat tezmer ad d-teg kra tɣiwant ma tger-d iman-is.
M. K.