Ulamma 20 n yiseggasen i yezrin segmi iɣab Tahar Djaout, s kra n win i t-yesnen neɣ ahat win yeɣran agerruj-nni i d-yeǧǧa d awezɣi ad t-yettu, imi tikta-s mazal ttenfufudent di tmetti, tid ileddin allen i lɣaci amzun akken d tafat deg yifri. Tira-s, ama deg wungalen neɣ deg yiɣmisen anda yeqdec, tecba tayeggirt yuɣen deg yiḥerqan tefka-d ṣṣaba, tin akken ara yessuzfen tagut ɣef wallaɣen n yimeɣriyen. « les chercheurs d’os, Les vigiles d L’exproprié» d waṭas n wayen akk yura ad ilin d inagan fell-as, d amusnaw yerran tamusni-s gar yifassen n yimdanen. Deg yiseggasen n 90 d asawen, kkren-d yimesḥaf ad beddlen tikli tikli i tmurt, ṭṭfen iberdan d leǧwameɛ, ɛebblen ad d-sersen buberrak ɣef yimdanen. Wa yeffer, wa yerwel, wa ɛerqent-as ! Imi, yeggugem, ula d amɣar azemni ara nciwer iɣab seg lqum-a. Tahar Djaout, yegguma ad yeqbel ṭṭlam i d-yeɣlin deg uzal, yugi ad yanez i llafɛa. Dɣa di lawan-nni i d-yenna :
Ma tessusmeḍ ad temteḍ Ma tenniḍ-d ad temteḍ Ihi, ini-d temteḍ
Awal-agi, icuba s ayen akken i d-yenna Lounis deg wawal-is :
Neɣ xtir eǧǧ-aɣ-d awal Ara iɛicen deg umkan-ik
Ihi, Djaout yefren abrid n wawal, yenna-d, ɣas akka tegla s temgerḍt-is, meɛna yegra-d d azamul n tlelli.
Ass-a, tajmilt i yettraju seg-neɣ d asnerni n twacult iteddun ɣer zdat, imi azwel-a d win yura d aneggaru deg uɣmis-is : « La famille qui avance et la famille qui recule. »
Ṭṭes di talwit !
S. M