Gar-aɣ sin wussan ad yesfugel umaḍal s umenzu n maggu yerzan tameɣra n yixeddamen. D ass n tɣimit yerna yettuxellas, d tajmilt ahat i uxeddam. Maca, ma nger tiṭ akka d wakka ad nwali acḥal n yimdanen i teɛna tmeɣra-agi d wid mazal ur rrin deg yimi tizeḍt n uxeddim. D aɣbel iḥuzan tuget n tmura n umaḍal, meɛna wicqa ma nebder-d ayen akka i yettilin di tmurt-nneɣ. Ɣef leḥsab n yisallen i d-yettasen, 11 % n yizzayriyen i tḥuza taluft-a. meɛna, limer ad neffeɣ s annar, ad d-iban wayen yeffren.
Deg Tubiret, uqbel taggara n yimalas yezrin, d timeyyatin n yilmeẓyen ur nxeddem ara i d-yemyagaren zdat n uxxam n twilayt iwakken ad d-beggnen lɣiḍ-nsen zdat liḥala ideg ttidiren. Din dɣa i ssutren iwakken ad mlilen d yimḍebber amezwaru n Tubiret. Isuɣan ggten, tekkan ɣef usuter n lxedma, tanezduɣt d tudert di lḥerma. Iḍul uraju-nsen iwakken ad ten-id-iqabel yiwen seg yimḍebbren. Ulamma tella-d temlilit, snat n tamiwin-a ur ssawḍent ara ad d-afent tifrat i uɣbel, imi akken i asen-d-yenna yimḍebber-a:” Akka tura, ur zmireɣ ara ad awen-ḍemneɣ ayen i d-tessuturem, ama d tanezduɣt neɣ d lxedma;” D ayen yesserfan ugar ilmeẓyen-a yerran lewhi n uxxam n Dayra n temdint iwakken ad ẓren imdebber-is. Maca, tanabat-is terna zzit i tmes, imi wid akka i d-yefɣen s abrid ulamek ara nnejmiɛen s yifassen d ilmawen: sewqen, ilaq ad d-qḍun ! Dɣa rran reffu-nsen ɣef tɣimit zdat n uxxam-a alamma tefra taluft. D acu kan, taluft-a iɣef ɛeddan yiseggasen d awezɣi ad tili tifrat-is deg yiwen n wass, dayen, ɛeddan fell-as yiɣuraf !
D acu n tmeɣra ideg ara ttekkin wigi ass n umenzu n maggu?
Deg Bgayet, tifidi tewweḍ s iɣes. Asmi akken walan yimdanen yenneqdaɛ layas, gren-d akka yiwet n tiɣri i unejmuɛ ass n lexmis yezrin. D yiwen n ulɣu yeddan s waṭas deg rreḥba n Facebook. Lweɛd yettunefk i temlilit sdat n uxxam n yidles n temdint-a iwakken ad ssutren deg yimḍebbren tiririt n yixeddamen iwumi yekfa leɛqed-nsen ɣer uxeddim, asenṣeb n wid yellan acḥal aya d ixeddamen s leɛqed deg yimukan ideg ttilin, aseḥbes n tmezizzilen alamma yekfa usenṣeb-agi n wid yellan deg unnar daɣ leḥsab n yiseggasen-a n uxeddim s leɛqed asmi ara d-yaweḍ lawan n ufuɣ n uxeddam ɣer taggara.
Amek ra sfuglen wigi s umenzu n maggu?
S. M.