D ayen iss d-txebbeṛ temḍebbeṛt yellan ɣef uqeṛṛu n tfaska massa Gaoua Salima di temlilit i tt-id-ijemɛen akked d tɣamsa ass n 28 ɣuct 2012 deg uxxam n yidles n Bgayet. Deg wawal-is massa Gaoua Salima tenna-d:” Tafaska tis xemsa n ccna d lmusiqa n teqbaylit d-yelin di lwilaya n Bgayet seg wass n 02 arma d ass n 07 cutember, i tikelt tamezwarut ahil-is ad t-nessufeɣ akkin i temdint n Bgayet, ɣer tɣiwanin-nniḍen s wakka ad nefk tagnit i akk imezdaɣ n lwilaya akken ad ssiwḍen a nezhen timeɣriwin n ccna d wayen akk yellan deg wahil”. Tesɛa n tɣiwanin ideg ara d-ilint tmeɣriwin , ti d : taɣiwant n Bgayet, Xerraṭa, Tinebdar, Akfadu, Beṛbaca, Amizur, Awqas, Aqbu , d tɣiwant n Leqseṛ. Am wakken yella di leɛwayed n tfaska, di yal uṭṭun ttarran tajmilt i yiwen neɣ i yiwet seg tgejda n ccna n teqbaylit; tafaska n useggas-a ad tili d tajmilt i ucennay Youcef Abdjaoui i yettwasnen d yiwen i d-yefkan aṭas i ccna akked lmusiqa taqbaylit. Deg wahil n tfaska i yebdan ddurt yezrin aṭas n tirmad (activités) ara yilin: timzizliyin n ccna ideg ara ttekkin waṭas n yicennayen iḥeffaḍen(amateurs) n temnaḍin yemxalafen n tmurt n Leqbayet, timeɣriwin ideg ara d-cnun waṭas n yicennayen n teqbaylit i yetwasnen ɣer uzayez(public) am: Ali Meziane, Hassene Ahras, Ali Ferhati, Brahim Tayeb, Boualem Berr, Abdelkader Bouhi , Ali Irsane, Louiza, Baylache, Boujemâa Agraw d wiyaḍ. Deg wahil daɣen tella-d temzikent n ttṣaweṛ d yimagraden ɣef umezruy n ccna n teqbaylit rnu ɣur-s timzikkent n yesɣunen imaziɣen d-yefser unaẓur Azri Ben Mohamed, aya akk yela-d i teɣzi n tfaska deg uxxam n yidles n Bgayet. Am wakken daɣen i ttwajerden deg wahil, yisaragen i d-yewwin ɣef yisental yerzan ccna d lmusiqa n teqbaylit, ad nebder seg-sen: asarag ara d-yefk ass-a mass Abdenour Abdeslam ɣef “ṛebɛa n tegnatin iɣef d-tɛedda tezlit taqbaylit”(les quatres étapes de la chanson kabyle), asarag-a yeila-d ɣef ṛṛabɛa d wezgen n tmeddit deg uxxam n yidles n Bgayet. Dima deg uxxam n yidles n Bgayet, tameddit-nni ɣef tesɛa n yiḍ, tella-d tmeɣra ideg d-tecna yiwet seg tgejda meqqṛen n ccna n teqbaylit, wa d Ccix Lounes Kheloui i d-rafqen sin n yinaẓuṛen imeqqṛanen-nniḍen: Haddad Fateh akked Abbas Nait Rzine. Iḍ n lḥed yezrin daɣen llant-d snat n tmeɣriwin-nniḍen, yiwet deg uxxam n umezgun n temdint n Bgayet ideg cnan yicennayen: Kacimi Bourai, Said Cheklat, Rachid Benchikh, Kerbache Abdelmadjid akked El Hadi Belbel; tameɣra-nniḍen di tɣiwant n Leqseṛ, deg-s cnan yicennayen: Ghanou Abdjaoui, Ait Hicham d Boubekeur Kharraz. Ahil n tfaska yekfa ass n lǧemɛa 07 deg cutember 2012, seg mesya arma d ass-n aṭas n temzizliyin d tmeɣriwin ara d-yilin ama deg temdint n Bgayet neɣ deg tɣiwanin i izeddin di teẓrigt n usaggas-a n tfaska n ccna d lmusiqa n teqbaylit.
Mokrane Chikhi