I teɣzi n wayur n remḍan yezrin, annar n tmidwa(stade de l’amitié) n tɣiwant n Sidi Ɛic yessemlal-d tasa d way turew ɣer yiwen n uturnwa n ddabex-uḍaṛ i d-tsuddes tdukla tanadalt SSSA n Sidi Ɛic, i d–yellan d tajmilt i yiwen seg yimyuraren iqdimen n SSSA wagi d lmeṛḥum Hocine Kerboube umi sawalen “Tarzan”. Aturnwa-ya ineǧḥen s waṭas imi i iɛedda di tegnatin yelhan yerna rzan-d ɣur-s waṭas n yimfeṛṛǧen seg tɣiwanin yemxalafen i d-yezzin i Sidi Ɛic; ttekkan-t deg-s 16 n trebbaɛ yettmettilen lḥumat yemxalafen n tɣiwant n Sidi Ɛic, rnu ɣur-sent tarbaɛt n tɣiwant n Cemmini akked tin n Bermatu(Tinebdar). Timlilit n taggara tella-d ger terbaɛt n “La mission” akked terbaɛt n Buḥlu. Taggara n temlilit teffeɣ-d i lfayda n terbaɛt n Buḥlu i iɣelben tarbaɛt n “La mission” s ugemmuḍ n sin ɣer ulac. Akken ad nesmekti, Hocine Kerboube neɣ “Tarzan», d yiwen n unaddal i yetwasnen aṭas di temnaḍt n Sidi Ɛic, yella d yiwen n umyurar n terbaɛt n SSSA deg yiseggasen n 80 d 90, yexdem daɣen aṭas d aselmad n usegmi n tfekka (EPS) deg uɣerbaz alemmas n Cemmini. S nnig n leqdic-is beṛṛa i unnar n uselmed, yexdem d asleɣmay n waṭas n trebbaɛ tinadalin di tɣiwant n Cemmini akked Sidi Ɛic. “Tarzan” neɣ Hocine Kerboube, d amdan ḥemmlen akk medden, ama d inelmaden-is neɣ imdukal-is; inadalen n temnaḍt n Sidi Ɛic zgan ttmaktayen-d acmummeḥ-is d nnecṛaḥa-s, imi netta d amdan tezga nnecṛaḥa deg wudem-is, yezga yettqessiṛ d yimdanen. “Tarzan», teccelqef-it tmettant ilindi mi yella yekkumpi di Bulimaṭ, yemmut s laksida deg ubrid. Wid i t-yessnen ladɣa imdukal-is d yinelmaden-is ama di Cemmini neɣ di Sidi Ɛic neɣ anda-nniḍen zgan ad t-id-ttmaktayen , zgan ad ttmaktayen taswiɛin yelhan i ddren yid-s, taswiɛin n leqfaza d ccṭaṛa, taswiɛin n nnecṛaḥa akked lfeṛḥ.
M. C.