Yettzid irennu umḍan n temliliyin tiseklanin taggara-a deg ukuẓ n tɣemmar n tmurt n yizwawen. Grent-d irebbi tuget n tddukkliwin tidelsanin i wahil-a s usuddes, qrib yal ddurt, n teɣlust taseklant akked walbaɛḍ n yimura seg tamiwin yemgaraden. Ahat, bdant snat n tddukkliwin anjar n ubrid d truẓi n usalu, tid n Bgayet d Tiɛwinin, akken kra n yimalasen ɣer sdat, ad ṭṭafarent yiwet deffir tayeḍ tddukkliwin-nniḍen, d timaynutin neɣ d tiqburin, s uheggi n ttiɛad-a aseklan seg tikkelt ɣer tayeḍ. Armi tura yuɣal d ansay deg ḥawla n tɣiwanin usihar-a aseklan. Ma nebder-d kra n temnaḍin i irefden aheggi n temliliyin-a tiseklanin, tella Buzgan, Bgayet, At Yanni, Aqbu, Melbu, Ccmini, Aweqqas d tiyaḍ. Amedya deg Uweqqas, ɣas ur sɛin yimheggiyen amḍan usdid, ahat ɛeddant akka tura 40 n temliliyin i d-yettuheggan segmi i d-iban uqeddic-a imalasan n tddukkla Azday Adelsan. Di Buzgan, ugar n temliliyin, armi yuɣal usihar-a yesɛa azayez ansayan. Ulamma acḥal i d-yeḍran d tigawin n ugdal tazwara, sɣur yinesdabuyen idiganen, maca s tddukkli n medden, i igan ula d tikliwin mgal aseḥbes n temliliyin tiseklanin, tuɣal tɛedda tidet, iɛedda rray n lɣaci. « Iwakken ad waliɣ asarag i yi-yehwan, tikwal ttaǧǧaɣ axeddim neɣ ttbeṭṭileɣ lecɣal i yi-d-yemmenden. Awi-d kan ur t-zeggleɣ ». I d-yenna yiwen seg wid yeṭṭafaren timliliyin-a. Dɣa, ula deg Usamar-anẓul n Bgayet, a-t-an tennulfa-d temlilit-nniḍen d tamaynut deg Lberj n Mira, ara yilin ɣef yiri tddukkla tilemẓit Itri n Ugergun. Seld asihar amezwaru i d-iga yiwen seg yimura n temnaḍt, ɛerḍen-d sem-a iɛeddan Mass Racid Ulebsir i d-yewwin asarag s uzwel “Acu i d-yeqqimen seg ssifat n teqbaylit? ». « D ayen igerrzen maḍi tnekkra-a n tddukkliwin i usnulfu n temliliyin tiseklalin. Nessaram kan ad ttwaɣeltent deg wayen yelhan, deg yidles-nneɣ. Wamma aheggi n teɣlust taseklant i usnerni n yidelsan-nniḍen, ur ttwaliɣ ara iwumi-tt. Lemmer ur d-tennulfa meqqar wala ». I d-yenna yiwen n urgaz seg Ayt Smaɛel.
M. K.