Aṭas n Waɛṛaben ara yessefṛeḥ yisalli-a ɣas ma cukken deg nniya n uwanek Aɛebri almend n umennuɣ ger Yisrayliyen d Yifalasṭiniyen. D yiwen n udipiti n ukabar n Likoud ay d-yessumren yiwen usaḍuf ara yerren almad n taɛṛabt d tamara i yigerdan deg wakk iɣerbazen imenza n Israyil. Yuɣ lḥal tutlayt taɛṛabt d yiwet seg tutlayin tunṣibin deg tmendawt tasrayilit.
Teqbel tseqqamut taneɣlifant tasuḍfant (comité ministériel législatif) tasraylit asaḍuf-a ara iḥettmen taɛṛabt i yibalmuden (écoliers) iɛebriyen seg 6 yiseggasen d asawen. Maca seg tama nniḍen asaḍuf-a ad iḥettem daɣen igerdan aɛṛaben ad lemden taɛebrit.
Ma ɣef tsebbatin iɣef qeblen yidipitiyen ama d izelmaḍen ama d iyeffusen asaḍuf-a yenna-d uneɣlaf n usegmi aɛebri Naftali Bennett belli annect-a i wakken ad yesnerni amsefhem ger Waɛṛaben d Yiɛebriyen : » Asmi ara mmeslayen Wudayen taɛṛabt, ara mmeslayen Waɛṛaben taɛebrit imir-n ad lhun wussan « …
Nukni deg tmurt-nneɣ, Ldzayer, mazal tuget n » Waɛṛaben » n Ldzayer, yugin ad lemden tamaziɣt ula i wakken ad issinen ugar aɣref-agi » nniḍen » ukud cerken tamurt. D tameḥḥeqranit tamettit (mépris de société) mgal tamaziɣt. Ula s yisem n takti-nni n » win ilemden tutlayt n uɣref ad yessinef i cceṛ-is « … Mi ara nwali amahil n tneɣlaft n usegmi Nouria Benghebrit, ad naf belli tura d adabu ay yuẓen ɣer sdat wala timetti imi llan ula d kra n Yiqbayliyen ay tt-yugin ula i ulmad!
Tiddukla Tadelsant Imedyazen