Aneγlaf n teywalt mass Ḥamid Grine, yexdem tirza n usefqed γer lwilaya n Tizi-Wezzu ass n 22 tuber yezrin ass aγelnaw n tγamsa tazzayrit, anda i yella γef lmendad n tulya n wexxam n tγamsa n Tizi-Wezzu s yisem n uneγmas Malik Ait Aoudia i tewwi tmettant ussan-agi yezrin mbaεd aṭan it-yeṭfen. Tamesbanit-agi tella-d s leḥdur n uneγlaf n yelmeẓyen d wadal mass Uld Σli Lhadi, Lwali n lwilaya n Tizi-Wezzu mass Brahim Merad, aselway n wesqamu aγerfan n ugarzu n Tizi-Wezzu mass Ḥussin Harun, tawacult n tγamsa d twacult n uneγmas Malik Ait Aoudia d yinemhalen n tmahliwin yemgaraden. Maca tiddukla n yineγmasen d yemcegεen n tγamsa akked wesqamu aγarfan n ugarzu n Tizi-Wezuu begnen-d lγiḍ-nsen imi ur-ttewcawren-ara γef amek ara d-yilli usemmi n wexxam n tγamsa-agi. Acu kan, aneγlaf n teywalt mass Ḥamid Grine, yenna d akken ad-tilli tegnit niḍen sya d afella anda ara nefk isemawen n yineγmasen yeγlin γef tugdut d tlelli n tγamsa am Allaoua Aït Mébarek d wiyaḍ niḍen. Axxam n tγamsa Malik Ait Aoudia n Tizi-Wezzu yesεa 40 n tzeγwa, lqahwa, tazeqa n yinejmuεen, u yella-d usbedi n merra ttawilat iwulmen akken ineγmasen n tira ad-xedmen di tegnatin igarzen, imi deqs n yineγmasen i yettidiren ugguren meqren di lxedma, ttruḥun deg wemkan γer wayeḍ d anadi γef amek ara cegεen isallen-nsen γer yeγmisen. Syen, aneγlaf n teywalt mass Ḥamid Grine, yesnarna deg ahil n radyu n Tizi-Wezzu, di 06 n ssbaḥ almi d ttnaṣfa n yiḍ, imi d yiwet n radyu id-yefkan aṭas n tallelt i lwilaya n Tizi-Wezzu xarṣum deg ayen icuden γer unegmu n lwilaya-agi, syen aneγlaf n teywalt mass Ḥamid Grine yerra tajmilt i twacult n tγamsa sumata, anda i yeεzem tikci n wallalen iwulmen i usebγes n waḥric-agi.
Islam Bessaci