Aṭas n lecɣal n tneflit i d-yettwaheggayen taggara-a deg tɣiwant n Amizur, i yeggugen s wazal n 25 n yikilumitren seg waɣir n Bgayet.
Deg yal aḥric, ad iwali yiwen kra yettmagga, bedden-as s wudem yelhan yimḍebbren n tɣiwant-a. D ayen kan i suturen yimezdaɣ n yal tamnaḍt, imi anezgum-nsen i yellan gar yimezwura, d tilin n wallalen n tudert ilaqen i wakken ad izmiren ad qablen ussan n tudert tartar. Dɣa, deg uḥric n tneflit d uselhu n tudert n yimezdaɣ, yella-d umaynut yessecrahen i Taddart Tameqqrant, imi d tamnaḍt i yesɛeddan ayendin d iḥeyyaren seg uɣilif n waman, n tissit abeɛda, i tt-icewwlen acḥal d iseggasen, tugart tugart deg unebdu. Aya imi, ɣef wamek i d-iban, qdimen maḍi yiqadusen i asen-yessawaḍen aman s ixxamen-nsen, armi i d-bran i ssḍiḍ. Maca, ɣef leḥsab n teɣbalut-nneɣ i iqerben i tɣiwant-a iɣef nettmeslay, ur mazal ad iɛeṭṭel xilla wugur-a ad yefru, akken ad snuffsen akk yiɣermanen n taddart-a. Meskud asenfar yerzan aseggem n uẓeṭṭa n usiweḍ n waman yezdigen – wid n tissit – ad yebdu ussan-a i d-iteddun, neɣ deg yimalasen-a n sdat-neɣ ma iɛeṭṭel. I lmend n waya, tebda yakan iqeddicen-is termist i yettukellfen s ureqqeɛ, ɣef wakken i d-tenna daɣen teɣbalut-nneɣ, send mi tqeɛɛed iman-is deg wadeg ilaqen i useqleɛ n lecɣal imezwura. Yezmer send anebdu, ad ilin mden yiqeddicen. Yewwi-d ad d-nesmekti daɣen belli yettuɣal wazemz n usbedd n uẓeṭṭa aqbur n waman deg taddart-a ɣer useggas n 1999, ulamma yettwawi kan ɣer tlemmast n udrum. Wamma seg yimir-nni, d iɣermanen s timmad-nsen i ixeddmen tuqqna i yixxamen-nsen seg uqadus-nni, akken ufan ur akken iwulen. Ɣef waya ara yenfeɛ s tidet uẓeṭṭa-a amaynut akk imezdaɣ n tuddar timecṭaḥ n tama-a, am umedya n Teymunt, Targa n Wiran, Tizi n Wuccen akked tlemmast n Taddart Tameqqrant. Ma yellan d taɣbalut n beṭṭu n waman, ad d-tas seg tneḍḍaft (acaṭu) i d-yezgan deg Msala, ɣer tansiwin n wid akk i asen-yesran.
M. K.