Ulama ɛerḍen kra n yilemẓiyen n temnaḍt ad as-d-rren rruḥ, s uheggi n kra n tigawin timecṭuḥin deg-s, acu kan mazal kra ur d-iban ɣef unammas-a adelsan n Lberj n Mira, deg tɣiwant n Tsexriwt, i yeggugen s wazal n 60 n yikilumitren ɣer Usamar-anẓul n Bgayet. D ferru i yettraǧu s lḥir akk umussu asdukklan n tɣiwant-a akken ad afen amḍiq yilemẓiyen anda zemren ad xedmen kra n warmud. Ad d-nesmekti d akken yečča uxxam-a n yidles tiyita meqqren asmi t-serɣen. Setta n yiseggasen tura ɣer deffir. Tamentilt n waya, d urrif i ten-yeṭṭfen imir-nni seg tulacit n tnezduɣin i ssutren. Dɣa, walan kan gar wallen aḥraq n unammas-a adelsan, armi teɣreq iseggasen-a ineggura tɣiwant-a deg txessast n warmuden n umussu asdukklan, abeɛda deg uḥric n yidles. Ula d tafaska n umunulug i tuɣ tettheyyi-d tddukkla Tigelzi n Rrif, iɣab later-is lawan-a. Tuget n yiɛeggalen yettwammerẓ-asen ufud armi bran i ṭṭbel deg waman, ur walan amḍiq neɣ d tazeqqa-nniḍen, anda ad neǧmen ad kemmlen aheggi n tfaska-a i yettwassnen akkin i twilayin-nniḍen. Imi ula d anaẓur Fellag, yella iɛedda syinna. Yewwi-d daɣ ad d-nesselɣu belli aql-it akka tura unammas-a adelsan deg yiri n Tenmehla n yidles n waɣir n Bgayet. Seg wakken aɛiwed n ureqqeɛ-ines yessutur-d aṭas n tedrmit, twala tɣiwant taqburt n Tsexriwt ala tikci-ines i tenmehla i d asellak, akken ad d-yuɣal i waddad amezwaru ideg i t-tuɣ. Maca, seg wass-nni, ur d-iban deg unnar wayen ara texdem tenmehla-a, deg wakud ideg ɛewqen yimezdaɣ n tɣiwant-a, ur gzin taluft.
M. K.