Ɣef leḥsab n wulɣu i aɣ-d-yewwḍen tanezzayt n wass n ahad yezrin, 9 deg wayyur n maggu, yewwi-d uḥuddu aɣarim (Protection civile) n Bgayet isalli ɣef usellek, tasebḥit n wass-nni, mettwal 01:05, n xemsa n yimdanen d irgazen, i yesɛan gar 18 d 37 n yiseggasen deg umdur. Akken i d-yewwi wulɣu-a, ɣlin yimdanen-a deg tqeffet n umunuksid n karbum, seld mi d-rzan seg Suq Ahras, ɣer yiwet n tnezduɣt di tlemmast n temdint n Suq Letnin. Ɣef wayen i d-tenna teɣbalut-a daɣen, qrib i t-yenɣa lgaz-a, i d-iteffɣen seg ufurnu n useḥmu n waman, lemmer mačči d tiḥerci n yirgazen n usellek, i ten-id-yessufɣen, wwin-ten dindin ɣer tzeqqa n udawi n temdint-nni. Si tama-nniḍen, ad d-nesmekti d akken yettkemmil uḥuddu aɣarim tidwilin-is n usḥulfu mgal indaren n tmes, imi la d-iteddu unebdu.
M. K.