Ass-nni n larebɛa yezrin (6 yunyu), i d-banen yigemmaḍ n ukayad n taggara n uswir amenzu (5e) n useggas aɣurbiz 2017-2018.
Leḥsab n wid i t-id-yewwin deg wakal akk n tmurt yewweḍ ɣer 797 812 s lqidar n 87,25%. Igemmaḍ n useggas-agi, ulin cwiṭ s 4,8% ɣef wid n useggas iɛeddan. Ma nsedda-d wid iɛeddan ɣer useggas amezwaru n uɣerbaz alemmas s tezmilt n useggas d tin n ukayad-agi, yewweḍ leḥsab ɣer 96,40% deg 48 n lwilayat. Azal n 10 351 n yinelmaden i d-yewwin tazmilt n 10/10 deg ukayad-agi. Ma deg umyezwar n lwilayt deg yigemmaḍ n ukayad-agi, i tikkelt tis 10 d lwilaya n Tizi Uzzu, i d-yettifriren deg umḍiq amezwaru. Imi seg useggas n 2008, d nettat i yettaṭṭafen taqacut n umyezwar deg yigemmaḍ n tlata n yikayaden n taggara n useggas. Deg wayen yerzan igemmaḍ n lwilaya n Tizi Uzzu, Ɛlaḥsab n tenmehla n usegmi-ines, azal n 17 009 i yejerden iman-nsen deg umuɣen (les listes) n usεeddi n ukayad-a, acu kan ala 16 969 deg-sen i t-sεeddan. Leḥsab n wid i t-id-yewwin yelḥaq 16642, s lqidar n 98, 07%. Ma yella s wid iɛeddan s asuffeɣ (passage), yewweḍ ɣer 99,45%. Ma d leḥsab n wid ur t-d-newwi ara, ad naf, 327 n yinelmaden. Akayad-agi i d-yellan ass-nni n larebɛa 23 mayyu 2018, yella-d usɛeddi-ines deg 371 n wulmisen n yikayaden, yettwaferqen ɣef yal tama deg wakal n lwilaya-agi. Azal n 485 n yiɣerbazen imenza i d-iḥellan 100% deg ukayad-agi, lmeɛna-s akk inelmaden yeqqaren deg-sen wwin-t-id akk. Ma tazmilt tameqqrant deg lwilaya n Tizi Uzzu d 9,98. Ad d-nesmekti kan, belli inelmaden-agi i yesɛan tazmilt n 5/10 neɣ ugar neɣ wid iɛeddan s usuffeɣ ad ruḥen deg wussan-agi ad jerden iman-nsen deg useggas amezwaru deg uɣerbaz alemmas. Ma deg wayen yerzan igemmaḍ n ukayad n BEM, tenna-d tneɣlaft n usegmi aɣelnaw Mass Nuriya Benɣebriṭ, ad bannen ass 18 yunyu 2018.
Adaoun Abdelghani