Mbeɛd semmus (5) n wussan n uḥessen d unegzum, seg 20 ar 25 deg yunyu, ass-a ara kfun yinelmaden asɛeddi n ukayad-nsen n taggara n useggas, neɣ n BAC. D akayad agejdan, ara asen-yeldin tawwurt n unekcum ɣer tesdawit, i tezrawin tifellayin. Kra n wussan send akayad, ulamma aṭas i iheggan s tɣuri, almad d ɛawaz n wuḍan, maca aṭas daɣen i iheggan iman-nsen seg tama tapsikulujit. Imi tikwal, yettili waddad n tnefsit n yimazwaren (candidats) n yal akayad, deffir usmurres neɣ uxsar. Ɣef waya dɣa, deg tɣiwant n Ayt Smaɛel, txemmem tddukkla RAJ, tigezmi n Ayt Smaɛel, i uheggi n usarag s uzwel n « Amek ad tesferkeḍ attqelleq akken ad d-tawiḍ akayad n Ubakalurya? ». Ɣas ma ur yemmug ara, ɣer taggara. Ar tura, mi mazal kan ad sɛeddin ass-a, mgaraden rryuy n yinelmaden ɣef wamek i asen-d-usan yisental. Llan wid i d-yennan fell-asen sehlen cwiṭ, abeɛda ma ihegga yiwen akken ilaq si tazwara. Am wakken llan wid i ten-iwalan weɛren, neɣ mačči akken i ten-ttraǧun. Yella-d umtawa tugart tugart ɣef tuɛert n kra n yisentel, i sɛeddan yinelmaden gar ahad d amhad yezrin. Tuget deg-sen, nnan-d belli mačči akken i ilaq ad d-asen imi, ɣef tmuɣli-nsen, win tferneḍ ur yettseɛɛid. « Zemreɣ ad d-iniɣ s umata, amek i yi-d-yusa ukayad n yilindi i ufiɣ win n useggas-a ». I d-tenna yiwet n tmazwart i iɛawden i ukayad-a. Send ad d-ternu: « d acu kan, tikkelt-a heggaɣ-as ugar, rnu ur xliɛeɣ ara aṭas meskud jerrbeɣ-t yakan ». Taggara, ad d-nesmekti d akken ayen yeɛnan tiririt n yigemmaḍ n ukayaḍ-a, ad ilin ass n 22 yulyu i d-iteddun deg wadeg internet n Uxxam aɣelnaw n yikayaden d yimsizwar (ONEC).
M. K.