I wakken ad yili uheggi iwatan i wuraren n yilel agrakal u ad kfun yiṣenfaren deg wakud i usiher i tettraju temdint n Wehran deg useggas n 2021, yesseḥres uqerru amenzu n lwilaya ɣef yiḥricen akk i d-yewwi ad ttwaxedmen di lawan. Ɣef waya, tella-d tirza d usefqed s anda ssawḍen lecɣal tazwara n ssmana yezrin. Aṣenfar amezwaru uɣur rzan, d abrid ara yesddukklen (la pécherie) n Wehran d udrar n Murǧaǧu, d abrid ara yawḍen alama d lqelɛa n Santa Kruz. ad tuɣal d adeg yufraren n tmerrit. Iṣenfaren-nniḍen, rzan asagen, imi lecɣal leḥḥun s tɣawla deg wadeg ameqqran n wurar d tukksa n lxiq i lfayda n twaculin. Am wakken daɣ ara d-yili usewseɛ n umraḥ n yimrigen (place d’arme), d usizdeg d uheggi n wadeg icebḥen iqublen asagen iwumi qqaren (Frond de mer). Tkemmel tirza tameddit n wass ɣer unnar ameqqran n Belqayed, 45 000 n yimferǧen, anida iwala s anda ssawḍen lecɣal, syin yumer takebbanit yettukelfen s beddu n tuẓut n leḥcic deg tazwara n ddurt-a sdat-neɣ, d uṣenfar-nniḍen dima deg waɣir amaynut n Belqayed anda yetturaju lebni n taddart timerrit. Ɣas mazal aṭas n lweqt ɣef ttiɛad, maca iṣenfaren yewwi-d ad kfun di lawan-nsen, akken mi d-yeḥḍer beddu n tfaska-a tanaddalt, ad d-yegri usterḥeb s yinebgawen ara d-yerzun seg yal tamurt n yilel agrakal (Fransa, Lispan, Tunes … atg) akken ara sen-yeɛǧeb lḥal.
Khaled. A