Yerra Mass amedyaz amaru Lxiyyeṛ Brahimi i tennubga n tesnawit Maεuc Idris s waṭaṣ n lebɣi d uheggi, anda i d-yewwi asarag ɣef wazal ageεmir i sεan yizamulen n rrqem d lebni deg tmetti taqbaylit. Asarag-a, yella-d s tallelt n Mass Xaldi Nabil, aselmad n tmaziɣt deg tesnawit-a, i lmend n usenfaṛ i sεant tneɣriyin n useggas aneggaru, iwumu fkan azwel : « Azal n wansayen deg tmetti taqbaylit « .
Imi, Mass Brahimi, yesuffeɣ-d yakan adlis ɣef yizamulen-a iwumu isemma « Yal azamul yesεa azal », i d-yeffɣen s tallelt n tddukkla Adrar N Fad. Fuṛsen yinelmaden i iḥeḍṛen tagnit i wakken ad d-agmen seg tmussni-s deg unnar-a. Dɣa asentel n usarag-a d « Azal n yiqennucen deg tmetti taqbaylit ». Ayen i yessefṛaḥen aṭas, d lebɣi, d fad i sεan yinelmaden i tmussni n uḥric-a n tgemmi tadigant.
Dɣa, ur ǧǧin ula d asteqsi ur as-t-fkan ara i umsarag, ama ɣef umezruy n yiqennucen, d unuɣen-nsen, ama ɣef wayen iwumi tettwasseqdac yal lḥila. Ur ttun ara, diɣ, ad ḥuffen ɣef umgrad i yellan gar yiqennucen-a, d yismawen-nsen i iteddun ad negren ma yella ur ten-nḥerrez ara. Seg tama-s, Mass Lxeyyer yessegza-ten akken ilaq, yerra-d ɣef yisteqsiyen-nsen s tumert, am wakkenni i ten-iweṣṣa ad ḥerzen ayen akk icudden ɣer wansayen-nsen, imi ur yezmir yiwen ad yelḥu ɣer sdat, ma yella ur yebdi abrid-is s wayen i bnan yakan yimezwura.
K.K.