Yegla-d uneqlab n lḥal i d-yellan deg taggara n ddurt iɛeddan, s ɣelluy n waman s ṭṭaqa, dayen i d-yessegran ibaxixen meqqren deg waṭas n yigerzuyen n tmurt n Lezzayer, d waṭas n tɣiwanin n ugerzu n Tizi Uzzu. Gar-asent, ad naf, taɣiwant n Mɛatqa. Aya, yeḍra-d s sseba n tregwa i iɣelqen s wakal d iḍumman. Neflen waman n ugeffur ɣer yiberdan, dayen i ikemmlen deg ujeggeḥ (détérioration) n uẓeṭṭa n yiberdan n tɣiwant. Ayen i d-ğğan yisenfaren n uɛawed n yiqadusen n waman n tissit, asenfar n lgaz n temdint d usenfar n unziz asekḍan (fibre optique), kemmlent waman n ugeffur i d-yewwten s ṭṭaqa. Dɣa, yeggra-d uẓeṭṭa n yiberdan n tɣiwant deg yir addad. Deg yal tardast n ubrid yeɣɣaz, aman deg tlemmast n ubrid, ulac win yezgel yir addad, ama d abrid n ugerzu wis 147, neɣ d iberden n tɣiwant. Imsebriden d imɛelmen n ttawilat n usiweḍ, yerkeb-iten lɣiḍ meqqren s sseba n ustutey n uẓeṭṭa n yiberdan acḥal d aseggas-aya. Ɣef leḥsab n yimsebriden, stehzan aṭas yimḍebbren teɛna temsalt deg uqɛad n yiberdan n tɣiwant, dayen i d-igellun s yibaxixen n yiberden, ɣas ma acḥal d aseggas-aya seg wass-mi i d-yeffeɣ usenfar n ugɛad n yiberdan n tɣiwant, ladɣa abrid icudden talemmast n tɣiwant n Mɛatqa ɣer tɣiwant n Izaruden, d ubrid icudden taddart n Uɛfir ɣer ubrib n ugerzu wis 128.
Ali Zalouk