Ɣas ma ṭṭuqqten yiɣeblan deg ubrid i d-yewwi, ɣas ma sɛuẓẓgen yimḍebbren i teɛna temsal ɣef wayen yessutur, maca netta dima yezga lḥir deg wul-is, yezdaɣ usiren tudert-is. Ayen i d-yemger n tussna, yekcem deg wallaɣ-is. Dayen tuɣ tugrint n break danse amekkan deg wul-is. D wagi i Hamid Bebouchi, yiwen n ilemẓi n taddart n Buḥamdun yettabaɛen ɣer tɣiwant n Mɛatqa, yesɛan 21 n yiseggasen deg tudert-is, isem-is anaẓur Bboy Rika. Break danse d hip hop, d ccḍeḥ i d-ibanen deg yiseggasen-agi ineggura deg tmurt n Marikan. Break danse, daɣen, d yiwet n tugrint n waddal i d-ijebden ɣur-s aṭas n yilmeẓyen deg tmurt n Lezzayer yessemḥasen i yiḍebsiyen n uẓawan i d-yufraren. Deg temḍiqt n Leqbayel, drus maḍi n yisriren (clubs) n break danse i yellan. Street Power Crew, yellan deg tɣiwant n Mɛatqa ɣef uqerru-is ilemẓi Hamid bebouchi, d awḥid deg temḍiqt-agi n Leqbayel. Yelmed Hamid break danse seg yigrawen yettwassnen deg tmurt n Marikan ugar n 4 n yiseggasen-aya deg tɣiwant n Mɛatqa, deg yiwet n tzeqqa deg tlemmast n tɣiwant, maca yiwweḍ-d wass- anda temdel tiwwura-s tzeqqa-agi, syin yuɣal yesluɣmuy deg uxxam neɣ deg ugama sdat n yimihan. Aya, yegla-d s yibaxixen ɣef tdawsa n yilemẓi, aṭas n tikwal. Ɣas akka, mazal ifadden-is qqwan. Deg useggas n 2016, yexleq-d yiwen n ugraw iɣef yella d aqerru, slaɣmayen deg yiwet n tzeqqa deg uxxam n yilmeẓyen n tɣiwant. Maca s ssebba n lexṣas n ttawitat iwatan i waddal-agi deg tzeqqa-nsen, yeḥbes ugraw, ɣas akken Ḥamid dima yezga yettkemil deg ubrid i d-yewwi, yettruḥu yal tikelt ɣer tɣiwanin n Boudjima d Tigzirt, i wakken ad d-yelmed, anda llan ttawilat iwatan. Ittekka unaddal-a aṭas n tikkal deg temsizzlin yemgaraden, aladɣa timsizzelt tagraɣlant n tmanaɣt n Lezzayer RedBull BC One, anda i d-yewwi imeḍqan imenza. Daɣen ittekki deg tfaskiwin d tmeɣriwin i d-yettilin ama deg tɣiwant, deg ugerzu, neɣ anda-nniḍen. Ferḥen nezzeh yimdanen s leqdic-agi adelsan. Iswi n Hamid Bebouchi ur yemgarad ara d iswiyen n yiɛeggalen n wugraw-ines, yessaramen yiwwen wass ad ssiwḍen ad sɛun tazeqqa anda ara sluɣmuyen dima d yimdanen yebɣan ad d-ttekin. Tazeqqa ara yesɛun yakk ttawilat iwatan, ad tili tgezmi n tugrint-agi n break dance. Yessaram, daɣen, asnegmu n tugrint d utteki deg temsizzliyin yemgaraden, ama deg temḍiqt n Leqbayel, deg temḍiqin-nniḍen n tmurt, neɣ deg tmura tiberraniyin. Tiɣri n Hamid i yimḍebbren teɛna temsalt, ama d imḍebbren n tɣiwant n Mɛatqa, ama d imḍebbren n tenmehla n yilmeẓyen d waddal n ugerzu n Tizi Uzzu, d tiririt s lewhi-nsen ɣer waddal-agi, ad fken afus n tallelt i yigrawen i iqeddcen s wul-nsen i lfayda n waddal, dayen ara d-yesselken ilmeẓyen seg yir iberdan.
Ali Zalouk