Am yal aseggas segmi i d-tennulfa, tella-d deg wussan n 18, 19, 20 d 21 deg wayyur-a n yebrir, deg temdint n Tubiret, taɣiwant n Leqser, teẓrigt tis tlata n tfaska n tmedyazt tamaziɣt, d tajmilt i wid yeɣlin deg tefsutin n 1980 d 2001. Tafaska-a, ɣef wamek i d-nnan kra n wid i as-iḥeḍren, temmug akken ilaq seg yal tamiwin, ama n usnubget, n llhu neɣ n wayen-nniḍen. Ladɣa imi leqdic-is sdukklent fell-as afus ugar n kraḍet n tdukkliwin-a, gar-asent: Amaziɣ, Tafat d Talwit. D ayen dɣa i yeǧǧan taɛkemt n uheggi-ines ad tifsus, i yeǧǧan daɣen wid yerzan ɣer dinna, ad d-uɣalen s ixxamen-nsen s ucmummeḥ n wudem, imi asen-hwan wakuden i sɛeddan deg-s. Ma nuɣal-d ɣer wahil i d-yellan deg teɣzi n rebɛa n wussan n ttiɛad-a adelsan, ad d-nebder tazwara timsizzelt n tmedyazt ideg kkin 63 n yimedyazen, gar-asen 13 n tlawin, d tmenna n yisefra n berra temsizzelt i d-yettwawin sɣur kra n yimedyazen-nniḍen. Asenz n yidlisen s ubuddu, yella-d daɣen, anda fursen yimeskaren tagnit, tuget seg-sen d imedyazen, sersen-d ayen i d-ssufɣen di tewriqin i win yebɣan ad yaɣ, ad iɣer ayen uran. Ula d aḥewwes ur yettwazgel deg wahil-nni, imi d-tella tirzi ɣer Tkejda, amekkan acebḥan yettwassnen di Tubiret. Ma deg yiḍ, tettwaxdem tmeɣra n ccna sɣur ucennay Kamal Cennan. Ass aneggaru n tfaska, ttwaberrḥen-d yigemmaḍ n temsizzelt i d-tefka tseqqamut n yinzurfa, gar-asen amedyaz Mebarek Gamar, ttwaferqen 15 n warrazen: 5 i wid i d-yufraren, 10 nniḍen, ttunefken i usebɣes. Arraz amezwaru yewwi-t Ǧilali Fawzi, arraz wis sin isaḥ-d i Ṭaher Arezqi, arraz wis kraḍ yettunefk i umedyaz Belqasem Siqadir, atg.
Kaissa Khalifi