Yekker Boualem yegza ifuk sswab, tfuk tudert, d anebdu aneggaru i d-yeqqimen send ad isekker umezruy tiwwura. Yuɣal wakud war tisemhuyin, war ccbaḥa, war lbenna. D aberkan kan, ur iban ansi i yebda neɣ ansi i yekfa. Igenni, yendem deg tafat i d-yettak zik. Itij, yugi ad yeslef i kra-nni n yimdanen i mazal ur rwilen ara. Mazal ssaramen ad d-yezzi i wakken ad yeslef i tfekkiwin-nsen s yizenzaren n tafukt. Yuɣal s tuffra kan i d-iteffeɣ ssbeḥ, yeṭṭaffar s lemɣawla tameddit, amzun akken yugad ula d netta. Anebdu-agi, gten irebraben. Yal tanzayt, ad d-sfeqden ɣer teftisin akken ad debbren ɣef yimdanen amek ara succfen, amek ara rsen iselsa. S iqendyar, isandalen, iccumar iɣezzfanen d irabuzen, sseɣlin-d rrebrab ɣef yimdanen deg teftisin. Tilawin, hetmen fell asent lhijab aberkan, ma d irgazen, ad succfen kan anda ulac tilawin yerna s iserwula. Tayri, taḍsa, tumert, talwit, asirem, tirga ggujlen. Imdanen rreglen yiwen yiwen ɣef teftisin armi i d-yegra yillel weḥd-s, yenfel d tusaft d leḥzen. Boualem Yekker, yugi ad yebru i lwaw am wiyad. Yeẓra imcumen-agi bɣan ad ssuddsen tudert akken i asen-yehwa. Bɣan ad d-sseɣlin tugdi ɣef yimdanen akken ad awḍen ɣer yiswi-nsen. Nessaram d akken imdanen, ad sɛun tabɣest, ur ttaggan-ara at iččumar, ad xedmen awanek ineslem deg tmurt n Lezzayer. Akken yuɣ tanummi deg yisegasen yezrin, Boualem Yekker, yeddem takerrust-is, yerna tawacult-is, yeṭṭef abrid ɣer yillel. Ruḥen ɣer yiwet n teftist tecbeḥ ugar n targit deg yiwen umekkan anda yemlal udrar akked lebḥer. Amekkan-agi, yebɛed ɣef tmanaɣt, mazal deg-s talwit, mazal ur as-faqen ara yirebraben. Sbedden aqiḍun-nsen ɣef yiri n teftist. Ḥemmlen ad slen i zzhir n lemwaji ticki i tturaren-t. Boualem d twacult-is, sɛeddan 3 n smanat n yimuras acek-itent. Kksen lxiq akken iwata xas akka llan kra n wuguren i wakken ad d-aɣen kra n tɣawsiwin, amedya aɣrum. Yecfa Boualem ɣef ass aneggaru n yimuras-nsen i d-yeɣlin ass amenzu n cutember. Imi i d-kkren ssbeḥ, uffan-d igenni d yillel rfan aṭas, heznen d ayen kan. Abeḥri yezuɣur isigna. Isigna, xedmen-d tili anect-ila-tt deg teftist. Iṭij, ur yezmir ad d-yesken iman-is. Boualem d mmi-s, ruḥen ɣer yigran i d-yezzin ɣef teftist akken ad asen-innin, qqimet di lehna, ar tufat, tanemmirt ɣef ccbaḥa-nwen i aɣ-iwansen acḥal aya! Boualem d mmi-s Kamal, leḥḥun deg ugama, wehmen deg ccbaḥa n yisekla, n yimɣan, n yiɣersiwen…Xas akka tekkat lehwa, ur nḥerwan ara. Taggara, uɣalen ɣer teftist, rnan ččuren allaɣen-nsen s tugniwin n ccbaḥa send ad uɣalen s axxam. Gren tiɣawsiwin i d-wwin yid-sen ɣer tkerrust, ṭṭfen abrid n tuɣalin. Imi mazal azal n 50 ikilumitren ad awḍen ɣer tmanaɣt, uffan-d kra n yilmeẓyen s iččumar, rsan iselsa am widak-nni i ttrusen deg tmurt n Afghanistan. Deg yifassen-nsen, ṭṭfen ibeckiḍen, ijenwiyen, irabuzen…gezzmen abrid s yidɣaɣen. Sseḥbasen-d tikerrusin, ttmuqulen tilawin ma yella rsan-t lḥijab neɣ ala. Boualem Yekker, yecca times, yekkuffer deg lbaṭel i xeddmen, maca ur yezmir d acu ara yexdem. Yesḥassef ɣef nnif i yeffɣen imdanen… Yettkemmil
Tahar Djaout. Tasuqqilt sɣur Hammar Boussad