Tella-d ddurt yezrin, tezrigt tamezwarut n rreḥba tadigant, i d-yellan deg tzeqqa n waddalen n Uxxam n yilmeẓyen n tɣiwant n Tizi Rached, i d-yezgan deg wul n lwilaya n Tizi Uzzu, ur tebɛed ara s waṭas ɣef temdit-a. D tazrigt yeddan ɣef teɣzi n 2 wussan, imi telli tiwwura-a ass-nni n larebɛa 24 tuber 2018, tessuli ass-nni n lexmis iɛeddan 25 deg waggur-agi ideg nella. Tella-d tesfugla n tulya tunṣibt, tasbebḥit n wass-nni n larebɛa, anda i d-iberreḥ uselway n Useqqamu aɣerfan aɣiwan n Tizi Rached Mass Sekrane Mokrane s tulya n rreḥba-agi. Deg wawal-is, yuɣal-d dɣa ɣer wazal sɛant tfaskiwin-agi n tfellaḥt ɣef tdamsa ama ɣef tmurt, ama ɣef yimezdaɣ. Ma ɣef wahil n rreḥba-agi, yella-d d anesbaɣur, anda i llant wazal n 40 n temsikniyin sɣur ugar n 45 n yimsikniyen i d-yerzan seg 4 n tɣemmar n ladayra n Tizi Rached. D timsikniyin yemgaraden, i icudden merra ɣer tfellaḥt, yecban allalen imaynuten d yiqburen swayes xeddmen ifellaḥen, isufar yemxalafen: iḥbuben, zzit, tamemt…atg. Massa Aklil d timḍebbert deg texxamt n tfellaḥt n At Dwala, tuɣal-d ɣer yiswi n rreḥba-agi, tenna-d: “D tagnit i yimezdaɣ n dayra n Tizi Rached i wakken ad issinen isufar i xeddmen yifellaḥen-nsen, d tagnit daɣen i yifellaḥen n tama-agi, ad d-seknen i yimezdaɣ imuhal-nsen”. Am wakken daɣen i d-llan sin n yisaragen ass-nni n larebɛa, yiwen ɣef uzemmur d wayen i icudden ɣur-s, ma d wis, sin yella-d ɣef tazart, imi tamnaḍt-agi n Tizi Rached tettwassen s yiniɣman. Ma si tama-s, Massa Akbal d taɛeggalt deg tɣiwant, tenna-d : “Nessaram yiwwas, ad nwali tazart akked zzit n Tizi Rached deg tɣara igerrzen ayɣer ala deg umḍiq amezwaru di tmurt n leqbayel, imi tettwassen s wannect-a”. Mass Oukaci Slimane, d imsiken n yisufar n confiture, yenna-d: “Nessaram sya ɣer sdat, ad ugtent tegnatin yecban tigi, imi ugur-nneɣ nekni s yimseftiyen deg uḥric n tfellaḥt, d lexsas n leswaq n tunzzut”. Ma d tasfugla n taggara, i d- yellan ass-nni n lexmis tameddit n wass, ttunefken deg-s yigerdasen n uttekki i yimsikniyen-agi i d-yerran i teɣri n Useqqamu aɣerfan aɣiwan n Tizi Rached. Yenna-d deg-s Mass Sekrane: “D tazrigt tamewarut, ur tettili d taneggarut imi tɛedda deg tegnatin igerrzen”.
A. A.