Mazal tiwaɣiyin n yiberdan, ḥeggsent tirwiḥin yal ass. Deg wazal n 10 wussan-agi kan ineggura, gar 21 alamma d 29 deg waggur-agi n tuber iɛeddan, mmuten 45 n yimdanen d wazal n 1 164 n yimejraḥ. Seg tallit-agi n 21 alamma d 27 tuber 2018, mraw d semmus (35) n yimdanen i yemmuten akked 1 121 nniḍen d imejraḥ deg 971 n yisehwa n ubrid, i d-yeḍran ddeqs n temnaḍin n tmurt, ɣef wakken i d-tenna tḥawact i gan yimeẓla n yiɣallen n laman n tmurt. D Lwilaya n Blida, i yessekles umuɣ ɣezzifen s tmettant n 3 n yimdanen, rnu 45 nniḍen d imejraḥ deg 49 n twaɣiyin n yiberdan, i d-yessuzren yiɣallen n laman deg yiwen n wulɣu. Ma deg tallit-agi n sin wussan, 28 akked 29 tuber 2018, jerden 43 n yimejraḥ d 10 n lmeytin deg ddeqs n twaɣiyin n yiberdan. Uṭṭun ameqqran yettwasekles deg lwilaya n Relizane, anda mmuten 4 n yimdanen, rnan ttwajerḥen 26 nniḍen, deg umyekcam n yiwet n lkar deg yiwwet n tkerrust deg ubrid aɣelnaw wis 23.
2 548 n lmeytin d 25 511 n yimejraḥ di ttesɛa wagguren
Azal n 2 548 n yimdanen i yemmuden d wazal n 25 511 i yettwajerḥen deg 17 883 n twaɣiyin n yiberdan, i d-yeḍran deg tẓa (09) wagguren-agi imenza n useggas n 2018, deg wakal n tmurt merra. D uṭṭunen i d-yefka ass-nni n lḥed, 28 tuber 2018, Wammas aɣelnaw n useḥbiber ɣef tɣelist n yiberdan (CNPSR). Alaḥsab dɣa n uɣbalu-agi, ma nserwes tallit-agi ɣer tinna n useggas iɛeddan, amḍan-agi yenɣes s wazal n 9,87% yisehwa (accidants), d wazal n 10,81% n tmettanin akked 8,57% n yimejraḥ. I usmeki, deg useggas n 2017, deg tallit-agi dɣa, yewweḍ wuṭṭun n laksidat-agi ɣer 19 559, ideg ttwajerḥen 28 647 d 2 827 n yimdanen i yemmuten.
Gh. A