Asfugel n wass n Lmulud
Ass n aram yezrin u i lmend n usfugel n lficṭa n lmulud, tessuddes-d Tenmehla n usedwel n lwilaya n Wehran s umtawi akked Tenmehla n waddal d yilmeẓyen yiwet n temsizelt n tazzla i yinelmaden n kraḍ n yeḥricen (aɣerbaz amenzu, alemmas akked win n tesnawit). Annect-a, yella-d deg unnar ameqqran n tazzla s yiɛudiwen di tama n Ssanya. Tebda temsizzelt ɣef 9 n ṣṣbeḥ. Ttwabḍan yinelmaden d taggayin n 50 i yal yiwet i lmend n leɛmer, ar taggara n tazzla, rebḥen kraḍ n yimenza. Kkin ugar n 400 n yinelmaden, uzzlen ɣef teɣzi n 1000 n lmitrat i yesɛa unnar-nni iɣef i d-zzin. Wid i d-yufraren di temsizzelt n tikkelt-a, ad ten-awin ad kkin deg tayeḍ ara d-yilin deg wussan i d-iteddun gar waɣiren. Timsizelt-a, d tagnit daɣen i yinelmden ad kksen ɣef wul, ad d-ffɣen acemma u ad ttun leḥris n uɣerbaz si tama, ma si tayeḍ, ad yeldi wallaɣ-nsen, ad d-skeflen tiɣawsiwin timaynutin ara ten-yallen. Yis-sent, ad snernin lebɣi-nsen di tɣuri.
Ayɣer yeḥbes utilifirik acḥal n yiseggasen-aya ?
Mačči d yiwen n usenfar mačči d sin i tuli takka, yeqqim kan akken. Mi gren asurif ɣer sdat, ad uɣalen s sin ɣer deffir. Akka i mmugen yisenfaren n tmurt, ulac win yebdan, ifuk akken i ilaq ad yili lḥal, neɣ xerṣum ur d-yelli ara uɛeṭṭel deg-s s kra n wagguren, tikwal ula s yiseggasen. Imdanen, ad ttrajun s lḥir melmi ara iẓer leqdic-nni tafat, ad ttmesteqsayen ayɣer i d-yella deg-s uɛeṭṭel. Maca ɣer yimḍebbren, tifrat zgant llant, ma mačči d lexṣas n tedrimt, ad d-afen timental-nniḍen. D akka i yella lḥal ɣef wayen iwumi neqqar atilifirik n Wehran. Mačči d keffu ur yekfi ara, maca yella ileḥḥu, yettwaseqdec acḥal d aseggas, asmi tbegges tmurt, ad temmager s ccbaḥa yal amerray (touriste) i d-irezzun. Deg ideg i nella, tadrimt tella, yallec yella, i ixuṣṣen d lebɣi. Amek armi atilifirik-a, yeḥbes kan akka? lawan Wid terza temsalt, ur nudan ad zṛen ayɣer, ur qelben, ad t-ṣegmen, yeqqim kan akken yettwaɛelleq zun d lexyal. Kksen idgan n umahil i yezmer ad d-yexleq usenfar-a: sneqsen asekcem n tedrimt i tdamsa; kksen i yimdanen allal n tukksa ɣef wul; allal n usiweḍ i win yebɣan ad yali ɣer tqacuct ɛlayen akk di Wehran, ladɣa i yinebgawen i d-irezzun sya ɣer da, ma ur d-glin ara s tkerrust, ur zmiren ara ad d-walin s lqerb aḥṣin n Santa Kruz deg udrar n Merǧaǧu neɣ ad zṛen amek yettwabna, amek yemmug akked wacu yellan din. Ma nga kan kra n umgarad gar twilayt meqqren am Wehran d tǧaret-is Tlemsan, ad naf aṭas n yisenfaren i yeddan akken iwata di tneggarut-a, gar-asen dɣa atilifirik yettawin seg tlemmast n temdint alamma d adeg yufraren di ccbaḥa Lalla Setti. Nezmer kan ad d-nini d lebɣi d ṛṛay iqeɛden i ixuṣṣen tamdint meqqren am Wehran akken ara teddu, ad tecbu timdinin n tmura yuẓan ɣer sdat.
Ad d-tessuddes Wehran tafaska n waddal n rrigbi
Yetturaju seg wass n 10 duǧember d tasawent, ad d-tessuddes temdint n Wehran uṭṭun amezwaru n tfaska tawilayant n waddal n rrigbi s tikkin n waṭas n trebbuyaɛ n twilayin-nniḍen. D tarbaɛt iwumi ssawalen s yisem n yizgaren n waddal n Wehran akked yiwet n terbaɛt tinebgit ara d-yefken beddu n tfaska-ya. Taẓrigt-a, d tamezwarut, d tin ara d-yilin s ddaw n leɛnaya n lwali n twilayt Mulud Crifi, s lmendad n tenmehla n yilmeẓyen d waddal akked tfidiralit tazzayrit n waddal n rrigbi d (la ligue) n Wehran. Ad tili tfaska-a d adellel i temnaḍt-a, acku yettraju-tt usiher n wuraren n yilel agrakal.
Achoui Khaled