Ulamma ala 4 n yiɣallen (ikilumiṭren), i tebɛed taddart n Tmizar n Leɣbar ɣef n Tizi Uzzu, maca ftin deg-s wuguren n yimezdaɣ. Taddart-agi mazal ar ass-a n wussan tettidir iseggasen-agi ineggura lexṣaṣ d ameqqran, deg yiḥricen d yisenfaren yemgarden n tudert tartar, gar-asen: yir liḥala n yiberdan, imḍiqen i yilmeẓyen, aɣbel n waman n tissit, trisiti deg yiberdan…atg. Ssuturen yimezdaɣ n taddart-agi n Tmizar n Leɣbar deg yimḍebbren teεna temsalt, ama d wid n Useqqamu aɣerfan aɣiwan (APC) n Tizi Uzzu ama d wid n lwilaya n Tizi Uzzu, i wakken ad d-rren lwelha-nsen ɣer taddart-agi yenḥafen aṭas si yal tama. Mebεed mi ttidiren akka tura deg tegnatin qessiḥen. Nnan-d yimezdaɣ-is belli taddart-agi si zik tettwaεzel, yerna mazal ar tura tettwaḥqer, acku ulac tadrimt yettwaxeṣsen i yisenfaren n unegmu i lfayda n taddart-agi, ara yessifsusen taεkumt ɣef tudert-nsen. Yenna-aɣ-d yiwen n umezdaɣ : « Taddart-agi akk i d taneggarut deg tɣiwant-a, ma nger tamawt ɣer tuddar-nniḍen n tɣiwant. I wumi annect-agi n tneḥyaf gar tudrin n yiwet n tɣiwant ». Ma d iɣeblan i d-ttmagaren yimezdaɣ n taddart-agi yal ass, ad naf deg tazwara aɣbel n waman n tissit, imi tikwal tteddun-asen-d waman ur nelhi ara deg yiteyyuten-agi iqdimen i mazal, yerna tikwal ur d-ttkafin ara i usuter n yimezdaɣ, yettnarnin yal ass. Cetkayen daɣen, ɣef ukemmel n usuffeɣ n waman n yizuliɣen seg yixxamen-nsen; imi mazal kra n yimezdaɣ ur tt-sɛin ara. Aɣbel-nniḍen i yerwin imezdaɣ-agi d win n yiberdan; imi abrid yeqqnen gar ubrid ameqqran n Tezmalt d win yettawin ɣer umkan iwumi qqaren Imenxan. D adeg anda zedɣent ugar n 20 n twaculin, ttɛeddayen yal ass deg waluḍ d yixmir (aḥlalaḍ) imi cwiṭ-nni n ubrid yellan yeččur d aman. Ayen i d-yernan asḥissef n yimezdaɣ-agi, imi d abrid i ttawin warraw-nsen ɣer uɣerbaz. Yella diɣ lexṣaṣ n teftilin n tafat n yiberdan, d tqenṭyar d tregwa yessuffuɣen aman. Llant tid yettwaxdamen zik, tura ilaq ad ttuεawdent, llant tid i ilaqen ad ttwaxdament, maca mazal ur d-tent-id-εnin ara ar imir-a. D annect-agi akk n yiɣeblan i yerran tudert n twaculin n taddart n Tmizar n Leɣbar, ladɣa amḍiq-agi n Yimenxan, ttidirent deg lḥif d lmeḥna. Ɣef waya, ssuturent deg yimḍebbren, ad d-lhin deg wuguren iceɣben allaɣ-nsen, u ad d-afen tifrat i yiɣeblan-agi s tazzla. Imi ɣef wakken i t-id-yenna yiwen umezdaɣ n tama-agi : « Imḍebbren-agi, hder neɣ qqim, am win yettmeslayen i uɛezzug».
Ghani Amazigh