Ass n arim yezrin deg Wammas agraɣlan n yisaragen Abdelatif Rahal di Lezzayer tamanaɣt, i d-banen yigemmaḍ n warraz Assia Djebar n wungal i d-yufraren deg tlata n tutlayin, tamaziɣt, taɛrabt d tefransist.
Ungal yufraren n tmaziɣt, iṣaḥen-d amyaru, amedyaz d uneɣmas Mhenni Xalifi, s wungal-is « Imehbal » i d-yeffɣen ilindi ɣer teẓrigin Ccix Muḥend Ulḥusin. Arraz-agi, i usmekti, ha-t-an deg tezrigt-is tis rebɛa. D tajmilt, d asmekti i temyarut-a meqqren i yemmuten deg 2015, Assia Djebar, i yuran isem-is s yisekkilen n wureɣ deg tsekla tazzayrit, d wayen akk i d-teǧǧa deg unnar n tira. Dɣa aṭas n wudmawen i iḥeḍren ass n tuffɣa n yigemmaḍ-a, gar-asen taneɣlaft n usegmi, aneɣlaf n teywalt d win n yidles, imyura, imsiẓrigen d wid iḥemmlen tira d yidles s umata. Arraz n tutlayt n taɛrabt, tḥella-t-id Nahed Boukhalfa, ma d win n tefransist yewwi-t Ryad Girod. S wakka, Mhenni yuɣal deg umkan n Linda Kudac i yewwin ilindi amḍiq amezwaru. Deg teẓrigt-a n 2018, kkin deg kraḍ n tutlayin 66 n wungalen (26 s taɛrabt, 32 s tefransist d ṭam (8) s tutlayt n tmaziɣt). Ad d-nesmekti kan belli ameddakkel-nneɣ Mhenni, yura yakan aṭas n yidlisen am wungal “Asdawan”, akken daɣen i ɣur-s tasfift n ccna i d-yessuffeɣ deg useggas n 2015. D aneɣmas, diɣ, deg Uɣmis n yimaziɣen n La Dépêche de Kabylie. Yumer ayendin s warraz-agi, akken i t-ibudd i yiman n uletma-s Kaysa Xalifi, tamyarut i aɣ-yeǧǧan ass n 25 yunyu yezrin. Nessaram-as afud igerrzen deg leqdicat-is merra, d warrazen-nniḍen sya d asawen.
K. A.