Taggara n ddurt yezrin, teffeɣ-d ɣer unnar yiwet n tesqamut ara d-iεegnen beddu n yiwen n usenfar s wazal-is di tɣiwant-agi n Beclul. Wa d yiwen n usenfar i ssuturen yimezdaɣ n At Yaεla i yerra wasif ɣer tama n ugafa n temnaḍt-agi. Γas akken s tmuɣli ur tebεid ara taddart n Yicihan, nnig kan 5 km ɣef Beclul, asif yekkan gar-asen yexleq-d iεewwiqen imeqqranen ama i yinelmaden neɣ ahat i yimezdaɣ i merra. Ama seg Yicihan neɣ At Bubker, inelmaden n uɣerbaz alemmas neɣ n tesnawit rwan lmerta n ttawilat n usiweḍ,; d ayen i yeğğan kra deg-sen ur d-ttasen ara di lawan ɣer yiɣerbazen-nsen labeεda deg wussan n tegrest. Ma d ixeddamen, zgan ttrağğun deg unebdad yettawin ɣer tudrin-agi, imi mačči aṭas n yifurguten i yessawaḍen.
Seg wasmi εeddant tefranin n 29 unbir 2008, imḍebbren n tɣiwant-agi d wid yellan di tejmaεt n twilayt (APW), ur ɣfilen ara deg unadi ɣef tedrimt ara yesseddun asenfar n lebni n yiwet n tqenṭert ara yesduklen snat n temnaḍin-agi tezdi yiwet n tɣiwant. Seg waṭas aya mi d-yella wawal n uqbal n usuter-agi n yimdanen, maca aɣilif ur yettwakkes ara seg yiqerra n yimezdaɣ n Beclul almi d ussan-agi iεeddan mi walan imḍebbren teεna temsalt ffɣen s amkan anda ara tili tqenṭert-agi.
D ayen ara yeğğen mebla ccekk ama d imezdaɣ neɣ d imḍebbren n tɣiwant-agi ad neqqsen fell-asen waṭas n wuguren. Am wakken ara yili d asenfar ara d-yezzuɣren wiyaḍ am lgaz d yisufar-nniḍen.
M. Smail