Yettlal-d wayen ɣef wayen ur nebni deg yifassen n wid werǧin teffaɣ targit. Akka, mi ticki ara iεeddi umdan deg ubrid yettawin ɣer lemqam n yimaɣrasen deg Agni n Timlilin, i d-yezgan deg ugaffa (nord) n tɣiwant n Tmizart deg daira n Wagnun, lwelha-s ad tt-id-yexḍef yiwen uεecciw ur nefki anzi ɣer wiyaḍ,; deg umdiq iwmi ssawalen Agdal.
Aεecciw-agi, iruḥ d imdewwer amzun d widak i d-sbadayen di tẓegwa n Lafrik, maca rriḥa-s, ixef-is iruḥ yakk d taqbaylit. Abrid yettawin ɣer-s yessa d ablaḍ,; ɣer yidisan-is d ttibuqalin, akk d tisyar n leqbayal n at zik.
Mi ara nqarreb, ad naf yettwaxdem s usɣar n uxlenj, yeslaɣ s tumlilit tacebḥant. Seg libɛid ara d-tesriḥeḍ rriḥa n lasel d-yewwin ccihwan n wakal.
Daxel, ɣef uyeffus, yella lkanun i d-yettmuddun lḥamu yettawin ifeṭṭiwej n tayri ɣer wul. Γef uzelmaḍ,; takana yessan s uεdil yessawalen i usteεfu, ma di tlemmast taseddart yebnan diɣ s ujdar akked wakal iɣef tezga lqahwa n tɣellayt akken ad tsifsus ɣef lexwaṭar. Γer defir maḍi, taɣaṭ akked yelli-s, rennun-d ccuq i rreḥba.
Belkacem mmi-s n umeɣras Mḥand U Sliman yettwasnen aṭas deg At Jennad, i d bab n tikti-agi. Mi ara d-yettmeslay ɣef wayen yexdem, deg wallen-is traq leḥnana ɣer umezruy n temnaḍt-nni. Mi yebda awal ur as–yettfak ara. Tidmi-s tettawi-t akin ɣer zdat. Yenna-k Belkacem: “Asirem-iw, limer yiwen n wass ad waliɣ merra Agni n Timlilin yeččur, si rrif ɣer rrif, d tizeɣwa am ti, akken ad yuɣal umkan-agi d annar n usteεfu d tukksa n lxiq. Aken tettwaliḍ s wulac i d-nexdem aya. Nexdem-it s wayen yellan da! S usɣar i d-tefka teẓgi yellan nnig-nneɣ akked wakal i d-tefka tmurt-a. Ilaq ad nefhem d lebɣi i ixeddmen mačči d ssεaya”
D tidet, Agni n Timlilin isuman tiẓgi n At Jennad yezmer ad yuɣal d amkan n tmerrit (le tourisme). Asalu yerẓa-t Mass Belkacem n Mhand u Sliman, amer ahat di ljerra-s ad ḍefren wiyaḍ.
Ait Slimane Hamid