Mass Ali Bedrici, lwali n twailayt n Bgayet, yerza ɣer At Ɛebbas deg tama n Ighil-Ali. Tikelt-a, tella-d tirza ɣer teqliɛt n At Ɛebbas. Taqliɛt n At Ɛebbas d taddart ideg ilul El Mokrani, d taddart daɣen ideg yesɛan azal n 161 n yimeɣrasen. D acu kan, seg zik yiwen ur d-iletha deg-s. Taɣiwant, mačči dayen ara t-iqabel imi mačči ala yiwet n taddart ay tesɛa. Ma d lwilaya, wis ayɣer ur as-fkin ara azal ɣas ma tella yiwet seg tuddar d-yefkan i umezruy azzayri. Abrid ara k-yawin ɣer din d abrid ay ɛawden deg useggas n 80. D abrid iweɛren i tnehrawt, yettwaɣen, lḥasun ḥader idɣaɣen ad d-ɣlin fell-ak a win iruḥen ad iḥewwes ad imuqqel deg umezruy n tmurt-nneɣ. Deg taddart, ixxamen ɣlin, hudden, ǧǧan-ten yimawlan-nsen, beddlen tamurt imi ula d nutni, d lḥeqq-nsen, ttnadin anda ara tɣer tarwa-nsen, anda ara imɣuren warraw-nsen fiḥel miḥyaf n tudert yuɛren deg yidurar n tmurt n Leqbayel. Imi yeẓra liḥala n teqliɛt n At Ɛebbas, iweɛɛed lwali n Bgayet, Mass Ali Bedrici, imezdaɣ d yimḍebbren n teqliɛt ad tent-tɛiwen lwilaya akken ad ɛiwden deg tazwara i taddart syin i ubrid d-yettawin ɣer din. D ayen yessefraḥen akken i d-yenna yiwen seg wid yettazzalen i ureqqeɛ yiwet seg tewriqin n umezruy.
D. I