Am wakken i yella lḥal deg waṭas n tɣiwanin n tmurt, iwala umdan taggara-ya yenqes maḍi uncad n wakal i tuẓut sɣur wid yettawassnen yakan d ikerrazen, neɣ d wid yennumen xeddmen kra n tbeḥyar, d timerjaɛ, akken ad ten-id-ɛinent ulama kra deg tudert-nsen n yal ass. Sebba n waya mačči kan d afus i ixussen neɣ i ulac. Imi simmal tettnekkar-d tsuta tayeḍ tettruḥu tin n wid yuɣalen d imɣaren ass-a, trennu ula d tayri-nni i ttuɣ tella gar umdan ed wakal-is. Ur inuḥ lebɣi ɣur yilemẓiyen ad kkren ad neqcen ad ẓẓun, akken azekka ad ɣelten. Skud iban-d d ayen nniḍen akk i ten-yecqan. Maca, yella seg tama nniḍen wugur d ameqqran, i nezmer ad d-nini d amezwar i yessentagen assaɣ i yesɛa umdan akked tyerza: wa d ugur n ubnaw. D lebni i d-yezgan taggara-ya d aɛewwiq deg ubrid n ukerraz neɣ n umdan menwala i yeṭṭfen deg yidles n tuẓut. Aya, imi yal mara tedduḍ kra n yimiṭren deg yimukan i ttuɣ xlan, ad tafeḍ tanezduɣt neɣ snat. Ihi, annerni n yixxamen yekki aṭas deg unqas n tyerza deg yidurar ladɣa, am umedya n tɣiwant n Ayt Smaɛel deg unẓul-asamar n waɣir n Bgayet. Ur ufan tabadut (lḥel) nniḍen yilemẓiyen i yebɣan ad gen axxam ala aqlaɛ n tmizar-nsen, ama d tid iqerben neɣ d tid n tẓegwa, akken ad sbedden axxam d amaynut, ladɣa wid i d-tettak lḥukuma deg yiseggasen-a ineggura. «D tidet. Aṭas n temnaḍin i nella nẓerr d timizar, iḥettem-d lḥal ass-a ad uɣalent d tinezduɣin. Rnu aya yettḥaza lɣaci merra». Akka i aɣ-d-tenna yiwet n temɣart. Yewwi-d ad d-nesmekti diɣ belli ula d tillin n waman s drus yeḍḥa-d d aɣilif i wid ixeddmen akal-nsen, abeɛda deg unebdu neɣ deg ssmayem!
Mhenni Xalifi