D-acu id yugran deg teẓgi nneɣ ? Yal aseggas d-annaren n teẓgi i yettruḥun kan akka « d-asfel » i timas yeččan azegzaw, aquran ! Ass-nni n sed iqubelen ass amaḍal n tiẓgi, tagi udem-is ur yessefraḥ ara deg t’murt nneɣ. Ma yella ad nebdar tama n’At Ɛebbas, anda tella tiẓgi muqren s kra n 8000 ihiktaren, izegren 3 n t’ɣiwanin, tigi d At Ṛẓin, Iɣil Ɛli akk d Buǧlil. D-acu kan, amur amuqran n teẓgi-agi yella-d deg wakal n t’ɣiwant n Iɣil Ɛli. Tiẓgi n Buni, akka i d-isem-is. Tama-agi tecbaḥ dayen kan. Ma yewwi-ken webrid ɣer teẓgi-agi, aken tezzuzen s lecbaḥa-ines. Acku ttazegzawt ṭul useggas. Attaf-em din isekla n: tayda, azimba, amadaɣ, taslent akk d-uxarrub. Ahat nettu kra n yisekla nniḍen… ! Amkan-agi as-t-ini-ḍ d-ttamsunt (paradis). Llan degs iɣersiwen, am cebbirdu (écureuil), uccanen, ilfan, iḥiqelen akk d ttsekkurin, aruy, izerdliwen, isebseben, imeddiwen, etg. Iɣersiwen-agi rnan-as tahuski i teẓgi. Lhawa-ines d-edwa i yimuḍan, yagi wid yuḍnen idmaren nsen neɣ turin, am lazem (Asthme). Aṭaṣ n yimuḍan yettceyiɛ-iten-id umejjay ɣer tama-agi ɛlayen n’At Ɛebbas, acku lhawa n tiẓgi yettara-d rruḥ, yerna yeṣfa, yeččur d rwayeḥ am tin n tayda ! D-acu kan, tiẓgi-agi tečča « tiɣrit » sɣur imdanen ur nesɛi allaɣ. Buni-agi izeger-itt webrid aɣelnaw wis 106, akka ihi, llan kra n yimdanen yettɛedin s ṭunubilat nsen ttḍegiren rṣaḍ ɣer tayedwa, ssumsen-tt akkit. Nejba ɣer kra n yimḍiqen deg teẓgi,-uh tamsunt-agi- nufa aṭaṣ n yigudiyen yezzin ɣef isekla. Ayagi yeslufeḍ tiẓgi n Buni. Llan daɣen kra n yimdanen sekaren timas, ama s lebɣi-nsen neɣ ala, imi tt-ḍegiren isebsiyen icaɛlen ɣer teẓgi mara ɛeddin s ṭunubilat-nsen. Akka, i ceɛllen-t timas « tiwaɣzniwin » deg Buni. Ṛuḥ keč tura sens-iten-t ! Deg useggas n 2012, Buni truḥ attengar, imi ṭul n-unebdu d timas caɛlen-t ! Aṭaṣ n yimezdaɣ n tama-agi snaɛten-d s yiḍuḍan nsen iserdasen n taẓulli (ANP) am akka ɣurṣen « d nutni i ceɛlen timas-nni akken ad ssufɣen irebraben yefren deg tesrafin nsen »! Tura, Buni attan « testaɛfa » cwiṭ deg timas. D-acu kan, imezdaɣ n’At Ɛebbas ugaden asmi ar ad d-yaweḍ unebdu ad d t-uɣalen-t timas… !
Syphax Y