Ilmend n waggur n remḍan ideg i nella, taɣiwant n Chorfa i d-yezgan di Ddayra n Yimceddalen tefreq azal n 800 n yiḍellaɛen i twaculin yenḥafen. Lemɛawna-agi tella-d ɣef snat n tikkal, imi tamenzut s wazal n 230 tettwafreq deg sin n wussan imenza n remḍan, tagi d tin i d-yekkan s-ɣur srabes n twilayt n Tubiret. Ma d 574 n yiḍellaɛen nniḍen, ttwaferqen ɣer taggara n yimalas amenzu n remḍan. Ineggura-agi, d taɣiwant i yiman-is i ten-id yeswejden seg tedrimt-ines.
Ma nwala ayen akka yettwaferqen, ad naf dakken drus, imi simmal yettnerni umḍan n wid yenxaṣṣen, ɣef ssebba n yimukan n uxeddim yuɣalen qefren neɣ ahat ɛziz-it i tifin.
Ulamma lemɛawna-a tella-d akka di lmendad i waṭas n twaculin, maca mačči d ayen ara yeṭṭfen ugar n wussan, d ayen yeǧǧan ahat tuget n wid yesfaydan ssuturen asnerni di lqidar n uḍellaɛ.
S. M.