Ddurt-agi yezrin, seg 09 ar 10 ctember, Tiddukla tadelsant Tagmat d yimezdaγ n taddart n yiḥemziyen heggan-d tafaska tis-snat n tqendurt n leqbayel.
Tafeska-agi, ḥedren deg-s iεeggalen n wegraw aγerfan n ugerzu n Tizi-Wezzu (APW), anelhal n lḥirfat n ufus, iselwayen n tγiwanin ( Kaïs Larbi, Illulen Umalu. Bouazza Mokrane, Wizgan) akked yimḍebber amenzu n Dayra n Wizgan, Mohamed Boularas.
Inebgawen n tfaska d yimezdaɣ fursen zzin-d i yibardan n taddart s yiwet n zzedwa n yiḍebbalen. Deg wahil n tmeɣra-agi llan-d isaragen, timziknin n teksiwin n leqbayel , ṭebqat d yisufar n wučči d wayen niḍen.
Aṭas n temnaḍin n lwilaya n Tizi-Wezzu i yettekan gar-asent taddart n Yiḥemziyen, Tiddukla n Faḍma n Sumer n Yillulen n Umalu, Wizgan (Saḥel), Ifiγa, Iεeẓẓugen, Buγni, Draε El Mizan, Iferḥunen, Σin El Ḥemmam…atg
Araz amenzu n temzizelt tewwi-t temnaḍt n Buγni n lwilaya Tizi-Wezzu.
Tafaska-agi tsudes-itt-id tidukla tadelsant Tagmatt n taddart n Yiḥemziyen s lemεawna n yimezdaγ-is. Tafaska tεedda i tegnatin yelhan aṭas, γas akken ulac win i sen-d-yefkan afus n tallelt, ama d imḍebren εlayen ama d wiyiḍ.
Islam Bessaci