Tulya n 3 n tesnawiyin d 6 n yiɣerbazen ilemmasen deg lwilaya n Tizi Wezzu:
Aḥric n leqraya d win yesɛan azal meqqren di Tizi Wezzu. Imeḍebren d wid yesḥersen ɣef uheggi n ttawilat. Aya d ayen yeǧǧan lwilaya ad tili d tamenzut deg yigemmaḍ n leqraya am le Bac, BEM d 6ème. Aseggas-a, azal n 209 745 n yinelmaden i ikecmen ɣer yiɣerbazen, gar-asen 91 314 deg uswir amenzu, 77 717 deg uswir alemmas d 40 714 deg tesnawiyin. Am akken i d-tella tulya n 6 n yiɣerbazen ilemmasen deg tɣiwanin n Meqlaɛ, Draɛ Ben Xedda, Nakira, Timizar, Wad ɛissi d Rǧawena (di tɣiwant n Tizi Wezzu). Si tama nniḍen, tella-d tulya n 10 n yiseččuyen deg yiɣerbazen n Ain El Hamam, Iɛeẓugen, Beni Douala, Draɛ Ben Xedda, Draɛ lemizan d At Wagnun, am akken ad tilli tulya n 3 n tesnawiyin deg Meqlaɛ, Suq Letnin d Iwaḍiyen.
D.I
…46 rran-tent
Aseggas-a yewweḍ leḥsab n yiɣerbazen imenza i imedlen tiwuura ɣer 46 deg lwilaya n Tizi wezzu Ɛla ḥsab n tnemhalt n leqraya, ssebba n waya d lixsas n yinelmaden si tama, d yinigi n twaculin ɣer temdinin si tama nniḍen. Ad naf tamnaḍt n Uzeffun d tin i yenṭerren s waṭas imi deg-s 13 n yiɣerbazen i imedlen tiwwura nsen seg useggas n 2004 ar ass-a. Ad nerr lwelha belli lwilaya d tin i iqdecen ilmend n uḥareb d uɛiwed n yiɣerbazen-a iwakken ad yili useqdec nsen deg uḥric n yidles neɣ aɛiwed n tulya nsen sya d afella.
D.I