Tagi d yiwet n tdukla i d-ilulen deg useggas n 2015 di Tubiret. Fkan-as isem n yiwen umeɣras “ Leulmi Belkacem “. Teqeddec tdukla i lmendad n yigerdan ixussen, imi ahil d amerkanti. Talalit n tdukla tusa-d akken ad tuɣal d tajmilt i umeɣras Leulmi Belkacem , syin ad ɛiwnen igerdan, wid ixussen d wid yuḍnen. Xedmen yilmeẓyen n tdukla yakan yiwet n tirza ɣer yigerdan i yellan di sbiṭar n Draɛ El Mizan, wid n sbiṭar n Tizi uzzu anda i d-asen-wwin aṭas n warrazen akken ad-ten-sferḥen, ad ttun aṭṭan-nsen. Akken, daɣen, i xtaren yiwet n taddart di tɣiwant n Frikat i d-yezgan di tqacuct n udrar anda yella aṭas n lexṣas, ama si tama n ttawilat n usiweḍ neɣ ayen-nniḍen. U lac d acu id asen-yettawḍen ɣer din. Ihi, tejmeɛ-d tdukla ayen akk ara yesbaɛden asemmiḍ ɣef ugrud di tallit n tegrest, ama d acettiḍ ama d ssiwan neɣ d isebbaḍen ara yemmelsen deg udfel iwaɛren di temnadt-agi , akken daɣen i sferḥen azal n 120 n yigerdan di taddart n Qalus (di lwilaya n Tubiret ) imi wwin-asen arrazen i lmend n lɛid tamezyant. Ad d-nader daɣen ttawilat i d-fkan i i wulmis psychopédagogique i d-yezgan di tɣiwant n Buɣni. Mačči d aya kan, imi iɛeggalen n tdukla wwḍen ula ɣer tnezruft deg yiwet n taddart di tama n Tɣerdayt , akken ad ɛiwnen 400 n yigerdan igujilen imi ffkan-asen lbus i lmend n lɛid. Mazal-iten qeddcen , akken i d-tberraḥ tselwayt n tdukla Massa Fariza Leulmi i uɣmis : “Aql-aɣ nettheggi-d lemɛawnat i wazal n 180 n yigerdan ara nefk di temnadt n Tissemsilt akken ad qablen yis-sen tagrest n useggas-a. Igerdan-a, d wid ixussen, d igellilen, d igujilen , d wid yuḍnen , terna-d deg wawal-is d akken ḥwajen lemɛawna si yal amdan akken ad yali umḍan n yigerdan ara d yesfaydin s lemɛawnat-a. Massa Leulmi tger-d tiɣri s yisem-is d taselwayt n Tidukla Leuli Belkacem akken ad d-ffken medden afus n lemɛawna i lmendad n igerdan-a i ixussen. “Limer yal yiwen deg-nneɣ, ad d-yefk cit, agrud ur t-yettxaṣa wara , d lwajeb fell-aneɣ ass-a ad nili d tiyemmatin d ibabaten n igujilen-a”, i tettweṣsi tselwayt-a. Wid yebɣan ad ɛiwnen tiddukkla di leqdic-a, zemmren ad ssiwlen ɣer wuṭṭun : 07 70 53 10 06 akken, daɣen, tzemrem ad twalim leqdic-nsen ɣef uɣarab-nsen di Facebook : Association du martyr Leulmi Belkacem .
Souhila Yamani