Ilmend n leqdic adelsan i d-ittwaheggan ilmend n waggur n remḍan di yal timnaḍin yemgaraden n tmurt n leqbayel, taddart n Wizgan tella di ttiεad, imi tasqamut n taddart, s lemεawna n tmehla n yidles n lwilaya n Tizi-Wezzu akked uxxam n umezgun Kateb Yasin, sudsen-d yiwet n temlilit n umezgun ass n lexmis yezrin 02 γuct 2012, deg ubṛaḥ n tmeγriwin n taddart-agi.
Imi ayen yellan deg wahil n wass d win i ttrajun acḥal-aya yimezdaɣ n temnaḍt-a, amkan yettwaheggan yeḍḥa-d meẓẓi ɣef lqidar n yimdanen i d-yusan. Dγa, akken tewweḍ tsaεet d 10 n yiḍ, Arezqi siwani i yettwasnen s yisem n Dda Meẓyan, yuli-d netta d terbaεt-is γef telwiḥin umezgun, anda i d-uraren yiwet n tecqquft iwumi qqaren « Argaz aneggaru » i d-yettmeslayen γef tγerma d umezruy lqayen n leqbayel d umecwar i d-wwin seg tallit n Adem d Ḥewwa , εeddan-d γef umennuγ n yimaziγen akked Yiferεunen di tmurt n Maṣer, anda i d-ssukken tamuɣli ɣef ṭṭrad yesker Cicnaq, d wamek yessaweḍ almi yesseɣli tagelda n Maser. Syen, wwin-d awal γef unekcum n waεraben, d ttawilat i sxedmen iwakken ad reṣṣin tutlayt d ddin i d-wwin di tmurt. Ula d tallit n yiṭerkiyen tedda-d di tceqquft n Dda Meẓyan anda i d-yesmekta tagelda n Kuku, d wazal n Ḥmed Ulqaḍi. Imir, d irumyen iɣed d-yemmeslay, anda i d-yebder ttawilat i yesseqdec unekcam-a iwakken ad yemḥu amezruy n Yimaziɣen di Lezzayer, imi yebda s ubeddel n yismawen n yimukan, tudrin, isaffen almi ula d tizegwa. Syen, ikemmel deg wawal-is iwakken ad d-yaweḍ ɣer tallit n wass-a, d wanda iɣer tessaweḍ tmurt n Lezzayer.
Imferğen tebεen rran akken ilaq ddehn-nsen ɣer tceqquft-agi anda i ḍṣan rnu ugmen-d aṭas n tmusni. S teγzi n 02 n tsaεtin n umezgun, yerna-d useḥḥar i yeswehmen mačči d kra imezdaɣ n Wizgan s tγawsiwin i d-yessufuγ s tḥerci mebla ma faqen yemdanen. Dγa tameγra tekfa tasebḥit n wass n lğemεa γef 02:30, tεedda di tegnatin igerzen.
Islam Bessaci