Ussan-agi, taddart n La Crête-Rouge i d-yezgan di tɣiwant n El-Adjiba tesfayda-d s yiwen n usenfar s wazal-is. Imi d ussan n uzɣal i d-iteddun, imḍebbren n tɣiwant-agi ssufɣen-d tadrimt iwulmen akken ad ssiwḍen aman i yal axxam labeɛda wid i d-yezgan ḍurfen kra si taddart.
Lecɣal bdan yakan deg yimalas yezrin, almi ula d abrid w-98 yettawin ɣer Bechloul atan iɣaz si snat n tamiwin-is; d ayen i t-yeǧǧan deg wussan-a yeḍyeq di kra n yimukan.
Ilaq kan ad d-nesmekti, taddart-agi ur tumin ara ahat ad d-yas lawan ideg ara mmiren waman deg yixxamen, imi tettwaɛzel s tidet, tettwaḥerrem seg waṭas n yisenfaren. D acu kan, imi laẓ yesweɛduyen ur ineqq, atan ufan imḍebbren i d-yerran, i d-yelhan d tlufa-nsen. Imi aman atan wwḍen ɣer waṭas n yixxamen, tamsalt n lgaz ur tettɛeṭṭil ara ad tefru.
M.Smail