Mi yewwed Dda Yidir ɣer tɣiwant, yekcem ɣer lbiru n Lmir, yufa yiwen n urgaz annect ila-t, aɛebbuḍ-is meqqer armi ur yezmir ara ad yerr tiqeffalin n lbista-s. Mi t-id-iwala yenṭeq-d : – Ha-t-an Dda Yidir, mreḥba yes-k ! Sliɣ sbeḥ-agi fell-ak ayen ur iqebbel ara wallaɣ n yal yiwen : Sliɣ belli tufiḍ taṭeẓdamt n Dda Azwaw; maca ar tura ur tt-id-terriḍ ara. Dɣa imir-nni, Dda Yidir, yebren yiles-is, ur yezmir ad yesuffeɣ ula d awal.
– Ah a Mass ! yax tesneḍ-iyi. Cukkeɣ laεmer iyi-d-tjebdeḍ lekdeb.
– Maca ula d Mass Buhmal laεmer i s-d-jebdeɣ. Imiren Dda Yidir ikkes-d seg ǧoib-is taqezzumt-nni i yufa, yenna-yas :
– A Mass d aya i yufiɣ i d-iwala jemεeɣ-t, iɣil-it d taṭezdamt.
– Maca iwala-k tettnadiḍ ayen-niḍen. Sakkin yezmer tettnadiḍ ayen i d-yeɣlin n sserf. Ɣur-i ifakulen-agi ad ilin seḥḥan. Dɣa Dda Yidir yezεef, yeffeɣ-d s tyita n tewwurt. Berra, yufa-d aṭas n lɣaci sseqsayen-t ɣef wayen yeḍran. Kra seg-sen ẓran d acu yeḍran, maca steqsayen-t akken ad msexren fell-as.
Lɣaci akk ẓran d acu yeḍran, lexbar yezreε am yiṭij yettḍeggiren irriqen-is deg yal tama ; yal win ara d-iɛeddin, yal win ara yemlil deg ubrid neɣ yesseqreb ɣef tewwurt n uxxam-is, Dda Yidir ad as-yeḥku ayen i yas-yeḍran. Tameddit, wammag ad iruḥ ad yesteεfu, netta xaṭi ; yewwi kra n yirgazen yesken-asen amkan anda i yufa taqezzumt-nni. Ass-nni ur yeṭṭis ara akk, yeffeɣ ula ɣer tuddar-niḍen akken ad asen-yeḥku. Maca, ala wid ur t-numin ara i yufa. Iɣaḍ-it lḥal aṭas !
Azekka-nni ssbeḥ,; yiwen n ufellaḥ isem-is Muḥend, yewwi taṭezdamt ɣer tɣiwant. Ziɣ d tina i iruḥen. Mi yesla Dda Yidir s waya, iruḥ iḥekku i lɣaci tikkelt-niḍen ayen i as-yeḍran, yeqqar-asen : “ twalam ! nniɣ-awen belli mačči d nek, maca kunwi tugim ad iyi-tamnem, d aya i iyi-iɣaḍen”. Ar tura ulac win i t-yettamnen. Ɣilen d netta i tt-yewwin i Muḥend, ixelles-it akken ad tt-yerr ɣer tɣiwant.
Dda Yidir ikemmel tudert-is deg leɣbayen. Ul-is yeknef imi yas-cellen ayen ur yexdim.
Mi tebda tegrest, yeqqim deg wussu, ur yezmir ara ad yekker. Ziɣen d lmut i t-id- yewwven. Mi yebda Yennayer, tuɣal lamana ɣer bab-is. Dda Yidir yemmut, netta yeqqar-as i yiwen n lǧar-is : “ A-t-an d taqezzumt i yufiɣ deg ubrid n ssuq mačči d taṭezdamt. Nek mačči d akeddab, mačči d amakur”. Mazal yettεawad-awalen-agi almi i as-yeffeɣ nnefs aneggaru.
Dɣa seg wass-nni, lɣaci n Yiɣil n Zzman akked tuddar i as-d-izzin ttawwin Dda Yidir d amedya i umdan iḥemmlen tidet, i win ur nettaǧa ara ad as-sneṭḍen ayen ur yexdim ara d win ur nettaǧa ara ad ssamsen nnif-is.
D tullist n Guy de MAUPASSANT
i d-issuqel s usemyezg Ferêat TANSAWT(d anelmad di Tqerbuzt)