Tadyant teḍra deg unebdu n useggas yezrin. Γer rrif n lebḥer n temdint Bgayet. Snat n trebbuyaɛ mlalent, mxalafent deg lecɣal. Seg wawal ɣer wayeḍ,; tadyant tettfukti. Kra yella kra yerna armi lexsem yekka-d nnig wawal yuɣal ikemmel s ubunyiw. Fiḥel leɛḍil, kra gar warrac-a, jebden-d lmus, yettwat yiwen deg-sen. Din din yensa.
Armi yezri useggas, s wamek i d-tewweḍ nnuba i tedyant akken ad tesɛu amḍiq deg uxxam n ccreɛ n Bgayet, ad ḥekkmen fell-as.
Tameddit-nni, leḥkem yeffeɣ-d ɣef sin n warrac-a yettwaṭṭfen. Yiwen ḥekkmen fell-as s lḥebs s teɣzi n wussan n tudert i as-d-yeggran ; ma d wis-sin ḥekkmen fell-as s 20 n yiseggasen d lḥebs.
Mi tezri ddurt segmi ttwaḥebsen warrac-a, win iɣef ḥekkmen s lḥebs s teɣzi n tudert, inesraɛ neɣ yurar-itt inesraɛ. Anwa yeẓran. Din din glan-d yes-s, iɣallen n laman ɣer sbiṭar akken ad t-sujin.
Zdaxel n sbiṭar, aneḥbus iwala taɛessast fell-as telwi. Ur iɛus kra, din din yezdi lqedd-is ineggez seg ṭṭaq, yeṭṭef tarewla.
Ar tura, iɣallen n laman mazal ttnadin ɣef uneḥbus.
Ait Ighil Mohand