Γer tmeddit mi qrib ad d-yeɣli yiḍ,; yekker bu ufrux-nni ad iruḥ,; yenna-as Lḥusin:
– Rnu cwiṭ ttxil-k ! Qqim ad tenseḍ,; listeɛ yella.
– Tanemmirt. Ilaq-iyi ad ruḥeɣ,; azekka zik ara kkreɣ.
– Wiyya-k ! Ɛeddi ad teqqimeḍ,; ssbeḥ ad k-ssiwḍeɣ s userdun anda i d ak- yehwa.
– Ikeṭṭer lxir-ik ! Ur k-ttɛettibeɣ ara. Keččini tesɛiḍ inebgawen aṭas. Tikelt-nniḍen!
Medden kra din ɣef tiṭ-nsen. D ayen kan i ksan. Dɣa mi t-walan akken, kuffren ! Amek Lḥusin amerkanti yefka azal i Ɛli n Baɛgu igellil, ur nesɛi ara awal deg taddart, nutni yeğğa-ten !
Kra n yimdanen qqimen d tarbaɛt ddaw n tzemmurt, bdan ttemcawaren. Gullen ad asen-sxerben nniyya, ad sluɣen tamda n tegmat i d-yeɣlin kan akka deg yiwet n teswiɛt gar sin n yimdanen ur yezdi ula d acemma !
– Ihi, akka ! Ar tufat ! Tanemmirt aṭas aṭas ɣef uperruki-nni.
– Ulac deg-s.
Yedda yid-s Lḥusin kra n yisurifen. Mi d-yuɣal yenṭeq ɣer-s yiwen yellan deg terbaɛt-nni n ddaw tzemmurt, yenna-as :
– Ḥqa ur t-tesseqsaḍ ara ma yella d ddker neɣ d llenta ufrux-nni i d ak-id-yewwi Ɛli n Baɛgu !
– Wellah ar d tidet. Ssiwlet-as-d ad d-yuɣal, ad t-nesteqsi !
Yuɣal-d Ɛli-nni, maca icumm-itt ; yella kra i d as-id-heggan yimcumen-nni n Funan. Yessen-iten, degmi iɛuss iman-is.
– Ssuref-iyi a Ɛli a gma, ur d iyi-d-tenniḍ ara ma d ddker neɣ d llenta uperruki-nni i yi-d-tewwiḍ. Amek ara t-ɛeqleɣ ?
– Yeshel akk ad as-tfaqeḍ a Zizi Lḥu.
– Amek ? As-yenna Lḥusin.
– Ma yella icennu ssbeḥ zik uqbel ifrax-niḍen; atan d ddker, yerna atan tameslayt-is d ccetla. Ma yella yessusem alamma cnan akk wiyaḍ atan d llenta ; yif-it ula d bururu, akken i as-yenna Sliman Ɛazem.
Lḥusin iduqqes, ifaq d yiman-is. Yerna medden akk ttnezzihen. Yuɣ-itt mkemda, yerẓa aqerruy-is, iruḥ.
M. Uqasi