Abrid yellan zdat n lmersa n Bgayet atan deg lmerta. Dayen, d tidet, ur yezmir yiwen ad yezzi ɣer ljiha-nni. Yettwaɣ ubrid, d nnger akk ! Ixmujen anect-ila-ten, agudrun yemmut, ikumya akk i d-yetteffɣen seg lmersa yettaran ɣer tama n ccerq n Lezzayer, ad ten-tafeḍ din ttrajun nnuba-nsen ad ɛeddin neɣ ad d-ɛemren sselɛa-nsen.
Seg liḥala am ta, ikumersiyen yellan deg ubrid-nni, yekkin deg umussu-nsen UGCA, ssawlen ad ḥebbsen tlata n wussan ma yella ur d-terri ara taɣiwant d twilayt ɣef wayen i ṭṭalaben. Nutni, ssaramen kan ad d-rren ad as-ɛiwden i ubrid ur nɛawed seg 1978 ar ass-a. Akken i d-yenna Nacer, akumersi yellan deg tama-nni : “nekni d wid yellan deffir n lmersa, wid akk d-yettasen ɣer da, ur keččmen ɣer temdint n Bgayet; učči-nsen da, aman-nsen da, aseggem n yikumya da, ma uḥwajen kra-nniḍen, ad tafen ɣer yikumersiyen i yellan da. Meɛna, ma yeḥbes yiwen deg ubrid-a, ḥebbsen akk wid deffir imi abrid yuɣal meẓẓi s yibrujen yellan deg-s. Ma keččmen-d s yikumya-nsen ɣer daxel n temdint n Bgayet, mačči kan ad texneq, d akuffir ara tt-yaɣen.”
D. I.