D tidet win i d-yennan d akken urar mačči d tusna. Ass-a, iban-d deg yinurar. Tarbaɛt n lalman i d-yefkan udem d ayen kan, terra-tt tin n La Serbie di rrif. Ma d tarbaɛt i cukken akk ad tawi taqbuct n umaḍal tuli tasawent sdat n terbaɛt nneɣ. Ulac win ara yamnen belli Ziani d yimeddukkal-is ur ttanzen ara mi ara qablen Gérard d Rooney. Maca, mi ara yurar wul ad d-iban wayen iɣef ur yedmi yiwen. D acu kan, ur ilaq ara ad neṭṭes ɣef sin n yimeẓẓaɣ, ad as-nini belli tura neffeɣ seg lɣerqa. Amɛadel sdat n Legliz, mačči lmeɛna-s belli tarbaɛt nneɣ tuki-d. Aɛessas n tcebbakt Mboulhi, yettekkin I tikkelt tamezwarut, yenna-d:” S tidet, nurar akken iwata. Maca, ur ntettu ara belli ɣas ur nexṣir ara sdat Legliz, maca ur nerbiḥ ara timlilit.” Wagi d izen n win yetturaren di tmura tiberraniyin ur yeffiɣ ara leɛqel. Acku, yeẓra mazal timlilit taweɛrant zdat Marikan. Si tama-s, asleɣmay Kapillou, yenna:” Ggumaɣ ad ɛeqleɣ imyuraren-iw deg unnar. Ur ẓriɣ acu i ten-yuɣen !” Udem i s-d-kecmen yizzayriyen d win yessefraḥen, kra n wid yellan deg unnar ssufɣen-d acu i kesben di lǧehd. Asleɣmay azzayri waqila yerra aḍar tikkelt-a, yerra deg yidis leḥnana yesɛa ɣer kra n yimyurar. Aṭas i d-yennan lukan akka i yebda taqbuct, ur nxetter ara sdat La Slovénie. Akken yebɣu yili lḥal, tarbaɛt taɣelnawt deffir-s d imelyunen n yimdanen i yeggunin lferḥ si tama-s. Ur yezmir yiwen ad isewweq akken kan i yebɣa, imi d tamsalt yerzan iseɣ. Ass-a, ɣas ma yella aɛeddi s aḥric wis-sin mačči d ayen isehlen, maca urar yecban win mgal Legliz d win ara yesseddun ɣer zdat, ahat d win ara yilin d lfal I temlilit sdat Marikan. Imi, mazal tarwa n leḥlal, taɛellamt n Lezzayer mazal ad terrefref di tmura tiberraniyin. Yebda, Ziani d Halliche d igrawlyin deg unnar, ulamma ttedirin di berra maca d idammen n At udrar i yettazzalen deg yiẓuran nsen.
M. Smail