Beggnen-d yimezdaɣ n temdint n Tichy, lɣiḍ-nsen deg liḥala i ttidiren yal ass, deg yiwet n tebrat i yuran i Lwali n Bgayet. Qqaren deg-s, asmi i ttɛawaden i ubrid aɣelnaw w-9, d nutni kan i ineṭṭerren deg-s nezzeh imi daxel n temdint i d-iɛedda ubrid-a. Azal n sin n yiseggasen, nutni ddren s uɣebbar d takka i d-yekkan seg uɛiwed n ubrid. Ass aneggaru, ur yewwiḍ aseggas segmi fukken, abrid yuɣal akken yella. Aman ttwezziɛen imi ḥuzzan iqudas deg leqdic-a, ǧǧan-ten akken ; iṭruṭwaren bdan tthuddun imi mačči akken ilaq i ten-xedmen, aɣebbar yuɣal-d imi agudrun waqil i as-gan i ubrid, akken d-qqaren yimezdaɣ mačči d win yelhan ; rnu ɣef waya uguren i d-ilulen seg twaɣiyin n ṭumubilat ur nettqadar la apulis la amezdaɣ la… Deg tebrat-a, imezdaɣ suturen deg lwali ad d-yesbedd tasqamut ara amek i ttwesserfen yimelyaren deg ubrid ur neṭṭif ula d aseggas.
D. I.