Seg wagur n yennayer 2009 i yebdan lecɣalat n useggem n ubrid-a yeqqnen tudrin n Semaoune akked tɣiwant n Chemini. Ugur ameqran i yellan deg ubrid-a icudden ɣer C.W. 173 d taseksart yellan deg umkan umi semman Taẓrut Gezlan. Deg yiseggasen iεeddan aṭas n txessarin i d-yeḍran dinna ladɣa deg wussan n ccetwa imi aṭas i yenneqlaben s sebba n tucḍa n ubrid.
S wakka tisquma n tudrin-a seqredcent tamsalt akked usqamu aɣiwan n Chemini (APC) ilmend n tifin n tifrat. I yeṭṭfen asenfar-a d yiwet n tkebbanit tusligt. Γas ma imezdaɣ sebren azal n 06 waguren i uɣlaq n ubrid s sebba n lecɣalat, ussan-a yekker lhul gar-asen ɣef temsalt n usiwseε-is d useggem n lfusiyat akked uεiwed n lgudru. Aya yella-d imi taɣiwant tkellef kan takebbanit-nni i ixeddmen deg umkan s usiwseε n ubrid d tɣuzi n lfusiyat ɣer wanda i tella tseksart (At Wraɣ). Rray-a d win ur neεǧib i yimezdaɣ n taddart n Sidi Lḥaǧ Ḥsiyen iɣer yettfakka ubrid. Tasqamut-nsen, tessutur deg l’APC ad tkemmel s lecɣal n usiwseε d tɣuzi n lfusiyat alamma d taggara n ubrid. Mass Mohammed Larfi yettmeslayen s yisem n tesqamut-a yenna-yaɣ-d « Newhem amek azgen n ubrid iseggem ma d azgen i d-yeqqimen bɣan ad t-ǧǧen d abrid n wuccanen. Γef waya nekni nessutur seg l’APC ad tkemmel i lxedma n wayen i d-yegran ».
Imezdaɣ ɣas ma iḥuza-ten uɣlaq n ubrid ladɣa immawlan n tkeryas maca ferḥen s tukksa n wugur-a n tseksart, assirem-nsen d akemmel n lecɣal usiwseε. Di leεḍil, ttekken abrid n taddart n Texlict s yin ttkemmilen ɣef uḍar ɣer tudrin-nsen.
Mokrane Chikhi