Deg umalas yezrin, uɣalen-d waman ɣer tudrin n tɣiwen n Iflissen n lebḥar i d-yezgan ɣef teɣzi n 40 km deg ugafa n lwilaya n Tizi Wezzu. Ayagi segmi tcudd ɣer ubaraj n Teqsebt seg Draâ Ben Xedda. Tuɣalin-agi n waman iɣef ur uminen ara yimezdaɣ i yuysen ad d-yaweḍ wass anda ara d-uɣalen waman ɣer yixxamen-nsen, anda uɣalent tbernin seg useggas n 1989 mebla ma yella-d useqdec-nsent. Aman wwin- lferḥ d ameqqran ladɣa deg wussan-agi n uɣamac. Seg waya ad tekfu lmeḥna n yimezdaɣ i yellan, ladɣa tilawin i d-yettawin-d aman deg ubidun n 20 n litrat ɣef uqerru-nsent, deg lebyur ibeɛden. Tiliwa-agi d tid iɣef tettuɣal tewwurt deg unebdu imi aman deg-sent qlilen. Γas akken mazal asurif ɣezzif iwakken ad awḍen waman ɣer yakk tudrin n Iflissen, ddeqs deg-sent ur asent-ttuɣalent ara ɛad waman. Ayagi imi iqudas n waman i yuɣalen seg 20 n yisegasen aya yečča-ten ssḍid. Ssrabes n waman d wid ara d-yelhun s temsal-agi n uɛiwed d usiɣzef n tɣunam n waman deg tudrin n Iflissen.
Dalila I.