Tessɣer-it ddunit akked tẓuri, mmeslent-t leɛwayed n teqbayelit, yezga-d d tizdit gar tsuta n yinaẓuren imezwura d wid n tura.
D bab n wawal urẓin akked uẓawan aḥnin, anwa ur yessuzen, xas ulamma s yiwet kan n tezlit, ucennay Taleb Tahar ? Xas ulamma yesḥassef ɣef kra n yicennayen n tsuta-agi taneggarut, xas ulamma zgan-d sdat-s aṭas n wuguren, ladɣa, lehlak-is (Lehlak n ssker i ireṣṣan deg-s azal n 30 n yiseggasen-aya), acu kan, ur yebri ara i ṭṭbel deg waman, akken qqaren yimezwura uɣur i d-yuǧew tabɣest. Yekkat akken yufa, s wayes yufa, xas ulamma yezga yettawi-tt-id deg nnican, yal tikkelt. Deg album-agi aneggaru anda i yecna akked waṭas n yicennayen-nniḍen, yecban Ali Ideflawen deg tezlit ‘’Layas’’, Kheloui Lounes deg tezlit ‘’Dadda’’…atg, Yuɣal-d Taleb Tahar ɣer unnar n ccna s 9 n tezlatin igerrzen : Later, Dadda, Layas, Yeggugem yiles-ik, S lɛezzat-iw, A medden, A Newwara akked tezlit Nebda. Deg-sent, yewwi-d awal ɣef wayen akk i iceddun timetti ɣer umdan, ama dayen yelhan, ama dayen ixussen deg-s. Nezmer ad d-nini, tizlatin-agi n Taleb Tahar, d akemmel i umecwar-is, d tallit-nniḍen deg tmeddurt-is imi tizlatin-is, seg tazwra, cuddent am tezrart, am yixfawen n udlis i d-mmseḍfarent. Yal tasfift neɣ album, d aḥric deg tudert-ines : deg-s urar, deg-s iɣeblan. D ta i tamɛict n unaẓur akken i aɣ-d-yenna. Yekker-d s iwellihen n yicennayen imeqqranen i as-yemlal lesrar n tẓuri. Yecna s umeslay azeddgan i irefden idles n tmurt-is. Yella-d d inigi ɣef tsuta, d amezgar gar usirem akked layas, d amsebrid ‘’deg ubrid yeǧǧan later, di lḥif i ak-yedda uḍar’’, akken i as-yeqqar deg tezlit-is. Am wakken i d-yefka tamuɣli-s ɣef kra n yimdanen, yenna-d : ‘’yiwen iles-is qeṭṭeɛ, ihedder ɣef wid i t-yifen. Yezmer ad yesqiṭṭeɛ, yettaddu i yigellilen’’. Acu kan, deg taggara, yemmekta-d, kamim ussan igerrzen. Xas ulamma, akka tura, aqerru-s yessa-t udfel, ɣer ccib n leɛmer-is, akken i as-tenna tinna i Ait Menguellet, mazal ul-is d aleqqaq, mazal-it yettmektay-d Ṭawes, ɣef wakken i d-yeḥka :
’’Ah a Newwara, mi akem-walaɣ di lḥara, tettakeḍ acbi ɣur-s.
Ah a Newwara, ul-iw ur yesbir ara, mmektiɣ-d Ṭawes.
Kemm d axalaf amecṭuḥ,
Nettat, teǧǧa-d ccama.
Tessendafeḍ-iyi leǧruḥ,
Lebɣi, neɛzel-it di tama.
Cfiɣ mi lliɣ d amecṭuḥ,
Ɣer ɣur-i i d-tettɣima.
Tura, kra din iruḥ,
Ddunit, tedda di nneqma’’.
Ihi, win yebɣan ad yegzu tadyant n unaẓur, ad isel i win iɛefsen tirgin ḥafi. Tizlatin-agi n Taleb Tahar, zemrent ad ilint d iḍrisen n tɣuri deg uɣerbaz. Deg-sent amawal iwulmen akked ttrebga yebnan ɣef temsirin n ddunit.
Hocine.Moula